30.11.17

Convocatoria de Asemblea Veciñal o 30 de novembro

Convócase Asamblea Ordinaria de Gondomar Concello Aberto,
Día: xoves, día 30 de novembro
Primeira convocatoria: 20.45 horas
Segunda convocatoria 21,15
Lugar: local de CABE no CDL

Orde do día: 
  • Lectura e aprobación, se procede, de actas anteriores
  • Toma de postura, se procede,  ante a proposta da Coordinadora de Entidades Veciñais de Gondomar sobre o Regulamento de Participación Cidadá
  • Organización do acto sobre a política forestal e contra os lumes de En Marea para o 21 de decembro
  • Organización da recollida de sinaturas da iniciativa popular para a creación dun parque de bombeiros no Val Miñor
  • Información municipal
  • Uso do local de CABE
  • Renovación da mesa da asemblea
  • Rogos e preguntas

20.11.17

Nota de Prensa: Sobre as notas de prensa relacionadas co pleno de novembro en Gondomar

 É a segunda vez que en Gondomar se presenta unha modificación orzamentaria por valor de 334.000 euros (curiosamente con partidas distintas), sen facer o máis mínimo esforzo para buscar apoios por parte do goberno en minoría.

A pesar de que o alcalde diga que non poderán facer obras importantes, a realidade é distinta: o que se levaba eran cousas que o Goberno xa fixo ou encargou, sen contar cos cartos previamente. Cuestións como as marquesiñas de deseño exclusivo do alcalde, por valor de 12.705 euros por dúas pezas (case tres veces máis do prezo dunha marquesiña estándar), as obras de reforma da biblioteca que significaron a expulsión de facto de Espazo Lectura, ou cartos para Educación, despois de que CABE presentara unha moción para reservar 75.000 euros do Plan Concellos para os colexios, a moción fose aprobada e o goberno a incumprira. Non contentos con iso, na proposta de alcaldía non cadraban os cartos que se pedían cos gastos comprometidos: nalgunhas pedíanse de máis e noutras de menos.

A planificación no uso dos recursos económicos é algo clave tanto para unha familia, como para unha empresa ou unha administración pública, cousa que parece que o Goberno non acaba de entender. CABE tiña claro que non ía apoiar os despilfarros que está acometendo o Goberno, pero consideramos que había algúns gastos que a pesar da mala xestión, tíñamos que salvar, como os relativos a servizos sociais, ás subvencións deportivas competitivas e ao premio Victoriano Taibo. Gastos os dous últimos que se producen todos os anos, e o goberno en lugar de reservar os cartos correspondentes, gastounos noutras cousas.

Como xesto de responsabilidade presentamos unha enmenda recollendo estas partidas. A proposta que a recollía foi aprobada por toda a oposición e un dos grupos do goberno, demostrando que nós dende a oposición temos máis capacidade de chegar a consensos que quen preside o goberno.

Con respecto á aprobación inicial da taxa da auga, o sentido do noso voto foi en contra por presentarse practicamente fóra de prazo (tiña que ser publicado no BOPPO, abrirse un prazo de alegacións de 30 días e aprobarse definitivamente antes de fin de ano) e por non negociar ningún tipo de mellora coa empresa Espina e Delfín, a cal o bipartito lle prorrogou a concesión 5 anos máis.

En relación á moción da APLU, o que vive fóra da realidade é o concelleiro de Urbanismo, quen se dedica a informar a poboación dicindo que non poden optar a axudas por ter ordes de derribo. A realidade é que estas casas non poden solicitalas por non dispoñer de licencia de obra.

Nós ofrecímonos a apoiar a súa moción se se comprometía a dar licencias independentemente da situación xurídica das vivendas, proposta que o concelleiro non recolleu.

Se quere resolver a situación urbanística de Gondomar, o que ten que facer é traballar nun PXOM. A día de hoxe, aínda non temos sequera un documento de inicio.

Jimena Varela

Gondomar Concello Aberto

18.11.17

Gondomar Concello Aberto volve levar o peso no Pleno Municipal celebrado onte


O Goberno bipartito de Gondomar tentou de novo levar a aprobación ao Pleno modificacións orzamentarias por 334.000 euros sen buscar apoios para sacalas adiante, e formando un "totum revolutum" de conceptos. Mesturábanse cuestións básicas como son as subvencións competitivas para entidades deportivas, gasto que hai que reservar xa que se fai todos os anos, pero que o Goberno gastou noutras cousas, con outros que non compartimos en absoluto, como o financiamento da obra da biblioteca municipal que supuxo a expulsión de Espazo Lectura da mesma, entre outros.

Ante esta situación, que se repite por segunda vez, e véndonos na tesitura de ter que votar de novo en contra, presentamos una emenda consistente en aprobar unas modificacións por importe de 71.220 euros e que contemplaba as partidas correspondentes as subvencións a entidades deportivas, ao Servizo de Axuda no Fogar e ao "Premio de Poesía Victoriano Taibo". A proposta coa nosa emenda foi aprobada cos votos a prol de CABE, PP, IxG e MM, e os votos en contra do PSOE, co que conseguimos desbloquear unha situación que levaba preto de catro meses estancada, e que ameazaba con deixar sen financiamento e subvencións a moitas entidades e iniciativas, dada a proximidade da fin de ano. A nosa acción responsable solucionou un problema que durante meses o goberno bipartito non foi quen de levar adiante debido á súa absoluta falta de diálogo e capacidade para chegar a acordos a pesares de estar en minoría, e a súa incapacidade para elaborar un orzamento para o Concello, o que lles obriga a traballar co orzamento de 2012 prorrogado.

O resto de puntos levados ao Pleno polo goberno consistiron en dúas declaracións institucionais ás que nos abstivemos. A primeira solicitaba a declaración de Gondomar como zona de emerxencia polos lumes,e tíñase que ter presentado inmediatamente despois dos incendios, non cando xa fóra solicitada polo Alcalde e aprobada a semana pasada polo goberno do Estado. Non contentos con iso, foi presentada en castelán. A segunda declaración foi unha mostra da improvisación e falla de coordinación cotiá do bipartito. Tiñamos 3 versións do documento porque non se puñan de acordo entre ambos grupos na Comisión previa ao pleno, e ata chegar ao mesmo non sabíamos cal erao o que se ía votar. O alcalde defendeu a súa e Manifesto Miñor intentou enmendala. Ao final quedou en auga de castañas, ao retirar Manifesto Miñor a súa proposta trala intervención do PP e a amenaza velada do alcalde de non aceptar a enmenda, na que se instaba ao goberno a cambiar as políticas forestais e de prevención e extinción de lumes. Nin falar xa de que se prometera enviar ambas declaracións á oposición para facer propostas e non se fixo. Nin sequera son capaces de ser dialogantes nunha cuestión como unha declaración institucional, que ten que ser ampliamente consensuada.

Por último, foron debatidas 9 mocións, 7 delas presentadas por CABE. Cinco delas foron aprobadas e as outras dúas retirámolas, unha porque xa fixo o seu efecto antes do Pleno e foi cumprida na tarde do día anterior polo alcalde, e outra, relativa a políticas forestais,  para intentar pactar unha redacción con outros grupos políticos para o próximo Pleno. Nós si somos quen de dialogar para tentar chegar a acordos.

3.11.17

Iniciativa Popular para a Creación dun Parque de Bombeiros no Val Miñor

A Lei 5/2007, de 7 de maio, de emerxencias de Galiza, no artigo 4 indica que á cidadanía ten dereito a unha resposta eficaz ante os riscos é a unha adecuada protección da súa integridade, dos seus bens e do seu entorno.

En numerosas ocasións constatouse que os actuais servizos na bisbarra miñorana para dar unha resposta ante o risco de incendios e outras emerxencias non foron realizados coa eficacia e eficiencia que son necesarios.

Que de acordo coa artigo 16 da Lei 7/2015, de 7 de agosto, de iniciativa lexislativa popular e participación cidadá no Parlamento de Galiza, faculta a calquera cidadán ou cidadá, xunto con outros nove, a promover e presentar unha proposición non de lei de iniciativa popular ao Parlamento galego.

A comarca do Val Miñor formada polos concellos de Baiona, Gondomar e Nigrán ten unha poboación permanente de 43.904 persoas. Esta poboación multiplícase na época estival chegando aos 100.000 residentes e tendo picos de poboación preto dos 120.000 habitantes, aos que hai que sumar a existencia de varios polígonos industriais como o do Porto do Molle ou a Pasaxe, no que están instalados numerosas empresas.

Esta bisbarra miñorana espállase nun territorio de 145,2 km cadrados dos que 34,9 pertencen a Nigrán, 34,4 a Baiona e 74,5 a Gondomar. A dispersión e a grande extensión do seu territorio, complican a atención das emerxencias, subliñando que os datos xeográficos falan da disparidade e contraste de altitudes que se rexistran entre as distintas parroquias, ás que temos que engadir as longas distancias e os pasos estreitos e dificultosos dalgunhas vías secundarias ou terciarias, polo que o tempo de resposta é fundamental e as veces vital.

Tanto a veciñanza estable como a estacional ou esporádica teñen dereito a unha resposta eficaz ante os riscos é a unha adecuada protección da súa integridade, dos seus bens e do seu entorno.

Actualmente os poderes públicos tratan de garantir este dereito cun infradotado Grupo de Emerxencias Supramunicipal que é xestionado pola mancomunidade do Val Miñor, contando co apoio do parque comarcal de bombeiros de O Porriño, que pola distancia entre a súa base e a comarca ten un tempo de resposta superior ao que consideramos adecuado (De 20 a 25 minutos).

Por todas estas razóns as formacións políticas de unidade veciñal e popular de Gondomar Concello Aberto, Nigrán Decide e Esquerda Unida de Baiona vimos de presentar hoxe no Rexistro Xeral do Parlamento de Galiza en Compostela unha Proposición Non de Lei por Iniciativa Popular para a Creación dun Parque de Bombeiros no Val Miñor, de xestión pública directa con base nalgún dos Concellos da Comarca, e no que se integre o actual persoal do Grupo de Emerxencias Supramunicipal (GES) da Mancomunidade do Val Miñor.

A Comisión Promotora desta Proposición non de Lei por Iniciativa Popular está formada por 10 persoas, cinco mulleres e cinco homes. Tres son de Baiona (Silvano Montes, Aroa Dominguez e Marta Montes), tres de Nigrán (Jose Cuevas, Carlos Gómez e Anxo Mosquera) e catro de Gondomar (Jimena Varela, Fátima R.Areal, Ana López e Pauliño del Río).
 
Esta iniciativa será examinada pola Mesa do Parlamento Galego na súa sesión do luns entrante para a a súa admisión a trámite.

Unha vez admitida, e logo da seu paso pola Xunta Electoral, procederemos á recollida das 2.500 sinaturas necesarias para a súa tramitación e aprobación se procede polo Parlamento Galego.

Hai razóns máis que de sobra para a instalación dun Parque de Bombeiros no Val Miñor

Gondomar, 03 de novembro de 2017.
Comisión Promotora da IP por un Parque de Bombeiros no Val Miñor.

25.10.17

Nota de Prensa sobre a situación do GES do Val Miñor

A Mancomunidade de Concellos do Val Miñor, integra aos concellos de Baiona, Gondomar e Nigrán, e espállase nun territorio de 145,2 km cadrados dos que 34,9 pertencen a Nigrán, 34,4 a Baiona e 74,5 a Gondomar.
Na actualidade habitan esta mancomunidade preto de 45.000 habitantes, chegando aos 100.000 residentes nos meses do verán.
A dispersión e a grande extensión do seu territorio, complican a atención ás emerxencias, e o tempo de resposta é fundamental.
Logo da vaga de incendios da fin de semana do 14 e 15 deste mes e da situación de caos, de ausencia de medios, de falta de protocolos de actuacións e de carencia de brigadistas e bombeiros. Logo da alarma xerada e da constatación de que estamos unha vez máis vendidos por falla de xestión das administracións competentes. De constatar unha vez máis, como no Prestige, que ante unha catástrofe o estado desaparece e actúa a xente do común. Seguimos nas mesmas.
Agora veñen as promesas, pero imponse a realidade. Despois de todo o acontecido, no Grupo de Emerxencias Supramunicipais do Val Miñor (GES) segue coas mesmas carencias, nesta semana que andamos durante 3 días o servizo estará cuberto por quendas con 1 so bombeiro. Acabouse o lume, acabouse o tema.
Volveremos repetir os mesmos erros? Lembremos que onte mesmo tívose que apagar un lume en Parada Nigrán, nunha zona xa afectada polo lume. Desde Gondomar Concello Aberto queremos denunciar esta situación e reclamamos que se mellore ás condicións de traballo e os recursos materiais e humanos do GES do Val Miñor.

Gondomar, 24 de outubro de 2017.
Asdo.: Pauliño do Río Iglesias.
Voceiro do Grupo Municipal de CABE.

22.10.17

Visita de Luis Villares e Paula Quinteiro a Gondomar

CABE, como marea local dentro do proxecto En Marea, organizou onte unha xuntanza no Centro Cultural de Vincios co noso voceiro nacional Luis Villares e a nosa deputada Paula Quinteiro para que coñeceran de primeira man a situación no noso concello tras a vaga de lumes. 

Ademáis de visitar algunha das zonas máis afectadas, xuntámonos con representantes de comunidades de montes, comunidades de augas, centros culturias e outras entidades, ademáis de con veciñas e veciños afectados, e expuxémoslles, entre outras cosas o abandono e falta de medios que sufrimos durante os lumes, e o desleixo que seguimos a sufrir, unha semana despois, por parte da Xunta de Galicia. Tamén falamos de iniciativas que se poderían levar a cabo nos próximos días e a máis longo prazo para paliar a situación actual e evitar que algo como o que estamos a sufrir volva ocorrer.





20.10.17

CABE ante o desastre do lume no Concello de Gondomar


A Asemblea Veciñal de CABE, ante a catástrofe do lume vivida nestes días quere sumarse á multitude de manifestacións, en primeiro lugar de pésame polas persoas falecidas no noso país e no veciño Portugal, e de solidaridade coas máis directamente afectadas polos efectos das lapas; en segundo lugar de  recoñecemento e agradecemento á veciñanza polo seu comportamento na loita contra o lume, que suplíu de novo a evidente carencia de medios; e, por último de esperanza en que os investigadores e a xustiza poidan facer o seu labor coa eficacia, liberdade e medios necesarios para esclarecer ata as últimas consecuencias as actuacións delictivas que orixinaron esta vaga de lumes.
Sen embargo, consideramos que quedarnos somente nunha declaración deste tipo sería quedar de brazos cruzados esperando a que algo como o acontecido volva ocorrer. Por elo, e co ánimo constructivo que sempre caracteriza as nosas propostas, queremos pór enriba da mesa unha serie de actuacións que consideramos necesarias, dentro do noso ámbito municipal, para paliar na medida do posible o efecto do desastre do lume vivido e evitar a súa repetición. Así, e con caracter inmediato, nas próximas horas, consideramos que o Concello debería pór en marcha medidas efectivas para:
1.     Organizar brigadas de voluntarias: Hai moitas persoas desexosas de facer algo, que ademáis se senten impotentes por non saber como actuar. Aproveitemos esa forza.
2.     Rexenerar o monte:
Minimizar a erosión: Facernos cun protocolo de actuación. Que os hai, doados de conseguir e doados de aplicar con voluntarios. Con indicacións adecuadas.
Favorecer a recuperación: Non se pode facer de calquera xeito, por máis que o ímpetu nos leve a querer plantar e sementar. Porque se queremos recuperar os ecosistemas non se pode sementar nin plantar calquera planta en calquera sitio. Neste senso, dado que este é un ano de landras, deberíase aproveitar para crear viveiros de carballos para a súa posterior plantación nos montes queimados.
3.     Realoxar o gando do monte. No Galiñeiro había dous rabaños grandes de cabras e algúns outros pequenos, polos menos tres de vacas e un de ovellas. Agora mesmo están acurralados onde os donos puideron metelos. En todo o concello hai extensións de campos de poulo, é decir, leiras que xa non se cultivan, pero que teñen diferentes donos e donas. O concello debería facer o esforzo de xestionar isto xa que é o último gando que queda en Gondomar.
4.     Investigar que aconteceu cos cabalos do monte.
5.     Visitar as parroquias e falar coa veciñanza nos seus distintos elementos organizativos: gandeiros, comunidades de augas, de montes, de veciñas, centros culturais....., como única maneira efectiva de conseguir unha información real da situación actual e poder organizar adecuadamente as medidas anteriores. Así mesmo, estas visitas permitirían facer unha recollida de danos particulares co fin de propoñer e solicitar axudas. Hai xente que perdeu os seus cultivos e ten dificultades para manter agora os animais.
Ao marxe destas actuacións inmediatas, consideramos que hai que analizar cuestións como, por exemplo, se se pediu colaboración aos concellos veciños en dotación de bombeiros, bombas de auga, policia... ou tiveron que ofrecela eles; se houbo a adecuada comunicación das autoridades coa poboación; se os presotes de auga contra incendios que hai construídos no monte tiñan auga; ou se as tomas de auga das traídas veciñais respectaron a cantidade mínima que debía quedar para o hábitat correspondente ou estaba toda nas nosas piscinas e duchas. E a máis longo prazo, abordar asuntos como se teremos coraxe de facer un PXOM que respecte os espazos naturais, que delimite seriamente os núcleos habitados e que respecte a distancia das casas ao monte; ou tentar reunir ás Comunidades de Montes cos propietarios das tomadas (montes particulares) e facer que xestionen o monte cun mesmo criterio, un criterio que sexa económico e ao mesmo tempo ambiental. Para abordar todas estas e outras cuestións, consideramos imprescindible que, tras case dous anos sen reunirse, se reactive a Axenda 21 local, como foro aberto e participativo no ámbito medioambiental e de desenvolmento sostible, no que todos os actores involucrados poidan reflexionar sobre os erros que se cometeron e definir políticas que eviten que o acontecido volva suceder.
Outro compoñente que consideramos esencial, é a posta en marcha no noso municipio dun labor educativo, implicando aos centros docentes do noso concello no coidado e reforestación do monte, así como a realización de actividades que impliquen ao alumnado e ás comunidades educativas no seu coidado, única maneira efectiva  para que se sintan parte do mesmo.
Esperamos e desexamos que, cada quen dende as súas responsabilidades, todas sexamos quen de estar á altura do que este desastre demanda, evitando, na medida do posible a sua repetición e que a veciñanza teña que recurrir a autoorganización para suplir carencias ou ineficiencias das diferentes administracións.
Gondomar, a 19 de outubro de 2017

Manifestación o próximo domingo 22 de outubro en Compostela

Dende CABE apoiamos a manifestación que se vai celebrar en Compostela o próximo domingo 22 de Outubro contra a Lei de Depredación de Galicia, e animamos a toda a veciñanza a participar.


Para aqueles que aínda non o saiban, chamamos Lei de Depredación de Galicia a unha lei aprobada o pasado martes 17 de outubro no Parlamento de Galicia e que oficialmente denomínase "Lei de fomento da implantación de iniciativas empresariais".
Esta lei foi aprobada pola vía de urxencia e facilitará que empresas multinacionáis "depreden" o noso rural, xa que modifica outras leis de gran importanca para a xestión do territorio, como son a Lei de Montes, a Lei de Augas, a Lei de Minería, a Lei de Aproveitamento Eólico..., provocando en todas unha maior desregulación e facilidades para as grandes empresas.

Algúns dos efectos de esta lei son:
  • Desregulación de todos os ámbitos: mineiro, eólico, forestal...
  • Desprotección da poboación afectada, que vai ver moi limitado o seu dereito a alegar ou poder obxectar algo a calquera proxecto. 
  • Facilidades nas expropiacións forzosas
  • Recortes na capacidade dos Concellos para decidir ante grandes proxectos empresariais eludindo así os controis locais e dependendo da Xunta.
  • A Consellería Industria terá poder case absoluto sobre case todos os temas, sen necesidade de ter en conta consideración que outra consellería poida facer, nin Medio Ambiente, nin Medio Rural, nin Urbanismo. Os informes destes outros departamentos van ser preceptivos pero non van ser determinantes. O último criterio, o que vale, vai ser o de Consellería de Industria.
Podedes obter máis información en:
http://www.contraminaccion.org/depredacion/

18.10.17

Convocatoria de Asemblea Veciñal de CABE o xoves 19 de outubro de 2017

Convócase Asemblea Veciñal de Gondomar Concella Aberto (CABE)

Día:  xoves 19 de outubro
 
Hora:
     20,45 h en primeira convocatoria
     21,15 h en  segunda convocatoria 
 
Lugar: Local de Cabe

Orde do día: 
  • Lectura e aprobación se procede de actas anteriores
  • Análise e propostas ante a situacion actual
  • Renovación da mesa da asemblea
  • Varios

12.10.17

Outra máis

Nunhas declaracións feitas hoxe o Sr. Alcalde de Gondomar aconsellou ao Grupo Municipal de GONDOMAR CONCELLO ABERTO a que se “pongan a trabajar por Gondomar que para eso fueron elegidos”.

Que diga isto quen hoxe mesmo suspendeu a Comisión informativa de asuntos do pleno, porque o goberno non tiña propostas que levar á sesión da Corporación municipal do mes de outubro, ten narices.

Esta é a realidade deste goberno e o seu compromiso coa solución dos problemas da xente de Gondomar. Ningunha iniciativa, cero asuntos que trasladar, tratar ou acordar no pleno de outubro. Non é a primeira vez que isto sucede nin será a última. Seica non hai temas dabondo que resolver.

Como di agora a xente nova de Gondomar “Que grande cavaliño”.

Nos si temos propostas e as levaremos a Pleno, que esperemos que se celebre, o próximo martes, día 17.

Gondomar, 11 de outubro de 2017. 
Asdo.: Pauliño del Río Iglesias. 
Voceiro do Grupo Municipal de Gondomar Concello Aberto

8.10.17

Nota de Prensa: Uso do galego

Diante da desaparición do galego nos sinais de tráfico no Polígono da Pasaxe e na entrada ao IES Terra de Turonio de Gondomar, sinais que levaban case dúas décadas sen que orixinaran ningunha controversia ou prexuízo a ninguén, o Grupo Municipal de Gondomar Concello Aberto quere manifestar o seu estupor e repulsa antes estes feitos ante esta nova agresión gratuíta e sen fundamento á lingua galega.

A normativa estatal de tráfico nada expresa contra os idiomas propios, entre eles o idioma propio de Galiza, o galego. (O artigo 5, apartado 1, do vixente Estatuto de Autonomía que establece que “A lingua propia de Galicia é o galego) 

O Real Decreto Lexislativo 6/2015, de 30 de outubro, polo que se aproba o texto refundido da Lei sobre Tráfico, sinala no seu artigo 56 que “As indicacións escritas dos sinais se expresaran, alomenos, na lingua española oficial do Estado”. 

O Real Decreto 1428/2003, de 21 de novembro polo que se aproba o Regulamento Xeral de Circulación establece no seu artigo 138 que as indicacións que acompañen os sinais "figurarán en idioma castelán e, ademais, na lingua oficial da comunidade autónoma recoñecida no estatuto de autonomía, cando a sinalización estea ubicada no ámbito territorial de dita comunidade”. A menos que Gondomar estea fora de Galiza, a retirada do idioma galego dos sinais é claramente ilegal, faise vulnerando a norma. Polo que é radicalmente falso que o goberno municipal estea cumprindo a lei ao establecer o uso exclusivo do español nos sinais.

Ademais esta acción do goberno municipal supón unha nova embestida aos espazos de normalidade e consenso no uso do galego. Os sinais do Polígono da Pasaxe levaban máis de unha década, o do IES Terra de Turonio 18 anos. Que interese esconde crear unha polémica artificial que non existe en Gondomar? A estas alturas quen denuncie un uso abusivo do galego en calquera ámbito da vida ou non vive na realidade ou simplemente ten mala fe.

Estamos ante unha proba máis da falla do apoio decidido polo uso e normalidade do galego do goberno municipal. A hipocresía dun goberno que mentres dicía unha cousa (manteremos o galego nos sinais) facían outra (encargar os sinais so en español).

Os poderes públicos están mandatados para garantir o uso do galego e para potenciar o seu emprego en todos os planos da vida pública, cultural e informativa.

Ante o retroceso en todos os eidos do galego, os representantes políticos temos a obriga de defendelo, de normalizar un legado histórico que recibimos.

En vez diso este goberno municipal non contento con deturpar a toponimia do Concello, de non cumprir coa Lei de normalización linguística en escritos, documentos, convocatorias ou informes, de utilizar carteis so en español nas indicacións das obras municipais ou nas novas instalacións de lecer ou deportivas, agora incumpre a norma ao excluír o galego dos sinais de tráfico.Debemos recordar que ninguén pode ser discriminado por razón da lingua.

Dende a normalidade e a cordialidade na defensa e o agarimo polo noso idioma o Grupo Municipal de Gondomar Concello Aberto exixe a reposición inmediata do galego nos sinais que foron suprimidos polo goberno municipal e levaremos ao próximo Pleno ordinario unha Moción en defensa da normalidade da lingua galega.

Gondomar, 7 de outubro de 2017
Asdo: Pauliño del Rio Iglesias
Voceiro do Grupo Municipal de Gondomar Concello Aberto

27.9.17

CABE volve solicitar unha rectificación pública do alcalde de Gondomar

Despois do bochornoso espectáculo en xuño (cando o sr Alcalde tivo que rectificar públicamente tras acusar falsamente a CABE de perder unha subvención), no pasado pleno do 21 de setembro o sr. Ferreira demostra que pouco aprendeu e volve facer o mesmo. Acúsanos de perder a subvención referente a Actividades medioambientais da liña 3.5 do Plan de Obras e Servizos da Deputación de Pontevedra, cousa que non é certa.

CABE entregou o proxecto para a solicitude desta subvención, consistente nunha campaña de fomento e educación na compostaxe, só a falta de cubrir o anexo (tiña que ser cuberto por un funcionario/a municipal, e a Concellería de Medio Ambiente carece de persoal propio) o día 30 de decembro de 2015. O prazo de remate para a solicitude desta subvención era o día 4 de marzo de 2016, data no que este grupo xa formaba parte na oposición. Se a subvención non foi finalmente enviada á Deputación, e polo tanto perdeuse, só é responsabilidade do bipartito.

É por isto que CABE volve esixir unha rectificación pública do sr. Alcalde e rógalle que deixe de culpar ao noso Grupo municipal da nefasta xestión do goberno que preside.

NOTA: Envíase anexo a Ficha de Control de Expedientes onde consta a data de entrega do proxecto ao secretario personal do Alcalde.

Gondomar, 23 de setembro de 2017.
Jimena Varela
Grupo municipal de Gondomar Concello Aberto



19.9.17

Boletín especial sobre o Centro de Saúde de Gondomar

O boletín especial de CABE sobre o Centro de Saúde xa está dispoñible en: www.cabe.gal/documentos/boletins/boletin-cs.pdf

Convocatoria de Asemblea Veciñal extraordinaria o 21 de setembro

Convócase Asamblea Extraordinaria de Gondomar Concello Aberto,

Día: xoves, día 21 de setembro
Primeira convocatoria: 18 horas
Segunda convocatoria 19 horas
Lugar: local de CABE no CDL

Orde do día:

  • Postura de Cabe ante o proxecto da Praza Paradela

8.9.17

Convocatoria de Asemblea Veciñal o 12 de setembro de 2017

Convócase Asamblea Extraordinaria de Gondomar Concello Aberto,
Día: martes, día 12 de setembro
Primeira convocatoria: 20.45 horas
Segunda convocatoria 21,15
Lugar: local de CABE no CDL


Orde do día:
  1. Composición do grupo municipal
  2. Campaña a prol do novo Centro de Saúde

4.9.17

Convocatoria de Asemblea Veciñal o 6 de setembro de 2017

Convócase á Asamblea de Gondomar Concello Aberto,

Día: mércores, 6 de setembro
Primeira convocatoria: 20.45 horas
Segunda convocatoria 21,15 orde do día:

Lugar: local de CABE no CDL

Orde do día:
  1. Lectura e aprobación, se procede, da acta da asemblea anterior.
  2. Información municipal
  3. Renovación da mesa da asemblea
  4. Rogos e preguntas

26.7.17

CABE: “Hai que ter moita caradura e cinismo para tomar como reféns a unhas nenas e as súas ilusións” (Valmiñor tv)


O goberno municipal levou ao Pleno do pasado luns as subvencións nominativas para o exercicio 2017, que foron aprobadas por unanimidade. Entre elas non estaba incluída ningunha subvención para o Club de Patinaxe Artística de Gondomar. Primeira mentira do Sr. Alcalde de Gondomar.
Hai dúas formas de conceder as subvencións, un procedemento ordinario en réxime de concorrencia competitiva (comparación das solicitudes presentadas) e un excepcional: o de concesión directa que son as subvencións previstas nomitativamente nos orzamentos, estas son as que se aprobaron no Pleno.
“Tiña por tanto o Sr. Ferreira dúas posibilidades: a concesión directa da subvención de 3.000 € ao Club de Patinaxe de Gondomar. Non foi a escollida polo Sr.Alcalde, xa que na relación que se aprobou por unanimidade no pasado pleno non estaba. E non estaba porque o Sr. Alcalde non a incluíu. El saberá o por que, só a el é imputable este feito tal vez por descoido, desidia, ou falta de xestión”, sinala Pauliño del Río, voceiro do Grupo Municipal de CABE.
A outra posibilidade é entrar xunto co resto das asociacións na concesión por concorrencia competitiva: a día de hoxe non está nin feita a convocatoria, nin aprobadas as súas bases reguladoras, nin nomeado o tribunal de valoración, nin publicitados os criterios de valoración, nin os requisitos para solicitar a subvención nin que documentación hai que presentar, nin polo tanto valoradas as propostas para ver as que se aproban e as que se denegan.
“Resumindo, o Sr. Alcalde volveu vender fume, comprometeuse a algo que non cumpriu, e faltoulle ao respecto non só a este Club de Patinaxe senón ás ducias de asociacións, entidades e clubs que solicitan subvención por esta vía e nada teñen garantido que se lles vaia conceder e que cantidade. Ou estaba anunciando o Sr. Alcalde que ía prevaricar concedendo a dedo una subvención que debía resolverse mediante unha valoración?”, engade del Río.
Para o voceiro de Gondomar Concello Aberto, “hai que ter moita caradura e cinismo para tomar como reféns a unhas nenas e as súas ilusións para mentir sobre o que pasou e pretender con isto que se lle dera carta branca para seguir gastando sen control”.
Segundo Pauliño del Río, o que o Alcalde propuxo no pleno nada tiña que ver co patinaxe senón cunha modificación de crédito por valor de 334.000 € porque en 6 meses xa gastou os cartos de todo o ano “e quere seguir gastando a escape libre”.
“Por que non lle explica ás asociacións culturais, deportivas, recreativas ou sociais que tampouco teñen este ano partida para as subvencións, a onde foron os seus cartos”, conclúe o voceiro de CABE.
O Grupo Municipal de Gondomar Concello Aberto fará público proximamente unha xeira de gastos realizados polo goberno bipartito, para que a cidadanía de Gondomar coñeza en que gasta o Alcalde “o diñeiro de todos e todas”.