Nota de Prensa sobre as acusacións do PSOE de Gondomar

Ante as declaracións do PSOE de Gondomar en diferentes medios, nas que acusa ao concelleiro de Gondomar Concello Aberto Josué Villar da perda dunha subvención correspondente a consecución de mercados de excelencia cando era responsable de Formación, Emprego e Dinamización Económica no goberno tripartito de Gondomar, queremos manifestar o seguinte:

1. O PSOE de Gondomar minte cunha grave acusación a un concelleiro do grupo municipal de CABE, que non forma parte do goberno de Gondomar dende o 2 de febreiro de 2016, cando pasamos a formar parte da oposición.

2. Dita subvención ven recollida no DOGA do 14 de Xullo de 2016, cando CABE xa levaba meses fóra do Goberno municipal, sendo os únicos responsables da tramitación da subvención no momento da súa publicación o goberno bipartito que preside o sr. Alcalde de Gondomar, Paco Ferreira.

3. Non deixa de sorprendernos a obsesión do alcalde e o partido que lidera con Gondomar Concello Aberto, chegando ata o punto de inventarse unha realidade alternativa na que culpabiliza a un partido da oposición da súa mala xestión do goberno.

4. Dende CABE esiximos unha retificación pública da información publicada nos medios e redes sociais por parte do PSOE, na que minte gratuítamente aos veciños e veciñas de Gondomar, como xa ven sendo habitual.

Gondomar, 22 de xuño de 2017.

Josué Villar Ballesteros

Grupo municipal de Gondomar Concello Aberto

Convocatoria de Asemblea Veciñal para o 19 de xuño

Convócase á Asamblea de Gondomar Concello Aberto,

Día: luns, día 19 de xuño

Primeira convocatoria: 20.45 horas

Segunda convocatoria 21,15 orde do día:

Lugar: local de CABE no CDL

Orde do día:

1. Lectura e aprobación, se procede, da acta da asemblea anterior.
2. Información e análise sobre a delimitación dos núcleos.Postura ante o pleno extraordinario.
3. Información económica.
4. Rogos e preguntas

Vídeo da campaña a prol dun Centro de Saúde axeitado para Gondomar

O Xoves 15 de Xuño o noso compañeiro Manuel Janeiro presenta o seu novo libro en Libraida

Convocatoria de reunión de seguimento da campaña do Centro de Saude

O vindeiro martes, 13 de xuño, ás 20 h. teremos unha reunión no local de CABE para reunir todas as sinaturas, facer reconto e coordinar as próximas accións da campaña do Centro de Saúde.

Nota de prensa sobre o pleno extreaordinario que tratará a delimitación de núcleos

Como xa anunciamos o venres 2 de xuño tras o Pleno ordinario, tras a petición e análise da documentación relativa aos núcleos de Penalba, San Roque e Prado, e contactar co resto do grupos da oposición, hoxe ás 13:26 presentamos a solicitude de convocatoria de Pleno extraordinario.

Na proposta de orde do día inclúese tamén a aprobación provisional da delimitación do núcleo de Campo Grande, tendo en conta o escrito da Xunta de Galiza, de data 01 de xuño de 2017, remitido ao Concello de Gondomar en relación á delimitación de dito núcleo, cun requirimento previo á súa aprobación definitiva.

Neste requirimiento indícase que a aprobación provisional desta delimitación de núcleo rural debe ser sometida novamente á aprobación polo Pleno da Corporación Municipal de Gondomar, xa que con posterioridade á súa aprobación provisional polo Pleno do pasado 26 de xaneiro de 2017 achegáronse por parte do goberno municipal á Xunta de Galiza unha corrección de erros, así como modificacións motivadas polo informe de Augas de Galiza, que non contaban coa preceptiva aprobación do Pleno da Corporación.

Tras a presentación desta solicitude de convocatoria por parte de todos os grupos da oposición, esperamos que o goberno municipal convoque canto antes a Xunta de Voceiros de carácter urxente que anunciaron o pasado sábado 3 de xuño.

Gondomar, 9 de xuño de 2017.

Jimena Varela

Grupo municipal de Gondomar Concello Aberto

Convocatoria de xuntanza do Grupo de Traballo sobre urbanismo, mobilidade e medio ambiente

Convócase xuntanza do grupo de traballo sobre urbanismo, mobilidade e medio ambiente
Día e hora: xoves 8 de xuño ás 10:00 da mañá

Lugar: local CABE

Acto polo novo Centro de Saúde en Peitieiros o 8 de xuño

Acto polo novo Centro de Saúde en Morgadáns o 7 de xuño

Acto polo novo Centro de Saúde en Mañufe o 1 de xuño

Acto polo novo Centro de Saúde en Vincios o 31 de maio

Acto polo novo Centro de Saúde en Couso o 25 de maio

Acto polo novo Centro de Saúde en Gondomar o 24 de maio

Acto polo novo Centro de Saúde en Chaín

Acto polo novo Centro de Saúde en Vilaza

Xuntanza de seguimento da campaña sobre o Centro de Saúde

Convocase unha xuntanza o luns 15 de maio de 2017 ás 20 horas no local de CABE sobre o desenvolvemento da campaña de construción dun Centro de Saúde que cubra as necesidades de Gondomar

Convocatoria de Asemblea Veciñal o 15 de maio de 2017

A Mesa convoca asemblea veciñal o vindeiro luns 15 de maio ás 21:00 no local de CABE, coa seguinte orde do día:

         -  Lectura e aprobación da acta anterior

         -  Posición de Cabe sobre os últimos acontecementos en EnMarea

         - Información municipal
         - Proposta do grupo de urbanismo
         - Proposta sobre mocións no pleno
         - Varios

Concentración na Ramallosa contra a violencia machista o 11 de Maio

Ante outro asasinato machista, nesta ocasión o de un neno de 10 anos de A Coruña asasinado polo seu pai cando disfutaba dunha visita dentro do reximen da custodia, convocase de novo a todas a concentrarnos no Val Miñor como xeito de repulsa e para berrar unha vez máis que O MACHISMO MATA!!

Será o vindeiro Xoves 11 de Maio ás 20:00 h. na Ramallosa.

 

Agradécese acudir vestidas de negro.

Acto polo novo Centro de Saude en Borreiros

Hoxe xoves 27, ás 20,30 horas faremos un acto de presentación de campaña 

"POLO NOVO CENTRO DE SAÚDE" 

á veciñanza no Centro Cultural de Borreiros.

Inicio de campaña por un novo Centro de Saúde que cubra as necesidades de Gondomar.

Este venres, (07/04/2017) mediante unha comparecencia publica Gondomar Concello Aberto inicia unha campaña por un Novo Centro de Saúde que cubra as necesidades sanitarias de atención primaria de Gondomar.

Estaban na Mesa os representantes de CABE: Jimena Varela, Josué Villar, Rosa Pascual, Jesus Araujo e Pauliño del Río, acompañados pola parlamentaria Eva Solla responsable de En Marea da área de sanidade no Parlamento de Galiza. Jesus Araujo, médico otorrino no HAC e membro da Asemblea Galega en Defensa da Sanidade Pública foi quen explicou as principais liñas da campaña.

Despois de anos de retrasos, recortes e paralización do proxecto constructivo dun novo Centro de Saúde de Gondomar con data 13 de febreiro de 2017, DOG nº30 publica unha Resolución, da Axencia Galega de Infraestruturas, do 6 de febreiro de 2017, pola que se anuncia a licitación do Centro de Saúde de Gondomar. Orzamento base da licitación: 2.987.667,35€.

A construción do Centro levaba paralizada dende agosto do 2015, o que significou a perda dos fondos europeos para a súa construción (Fondos Feder Galicia 2007-2013) 

Esta nova licitación ten un aumento de 600.000 euros con respecto ao proxectado no 2014 pero as prestacións do servizo serán as mesmas: seis consultas de medicina xeneral y outras tantas de enfermería, un área de pediatría con 1 consulta médica y outra de enfermería, así como 1 consulta de matrona.

É un centro mal dimensionado e insuficiente que nace xa cun déficit dende o seu proxecto. Está previsto para unha poboación de 10.280 usuarios, cando segundo os datos oficiais do mes de abril deste ano do padrón municipal, Gondomar ten 16.085. É dicir un 56% máis de usuarios que os previstos no novo centro.

Na actualidade no Centro de Saúde ten 7 médicos de familia, 1 pediatra, 7 enfermeiras, 1 auxiliar de enfermería e 4 PSX/Aux.Adm e 1 Matrona.

A proposta do SERGAS para o Centro de saúde é : 6 médicos de familia (perdemos un con respecto ao que temos na actualidade), 1 pediatra (igual), 6 enfermeiras (perdemos 1 con respecto ao que temos), 1 Auxiliar de enfermería (igual) e 2 PSX/Aux.Adm. (perdemos 2 con respecto ao que temos). Matrona 1 (igual).

Ademais redúcese a superficie total , sobre una previsión de superficie construída de 1.565 m2 no proxecto do ano 2.009, pasase a una superficie de 1.039 m2. En total se reducen 526 m2, o 33,61% do total.

Tendo en conta os estándares de consenso para este tipo de centros de atención primaria que son:

• Médic@s de familia 1/ por 1.250 usuarios.
• Pediatría 1/ por cada 800.
• Enfermería 1/1.250 usuarios.
• PSX: 1/3.500 usuarios.
• Matrona 1/ Servizo de atención primaria.
• Fisioterapeutas 1/ 10.000-15.000
• Traballador Social: 1/SAP.

A Gondomar lle corresponderían segundo estes estandares o seguinte cadro de persoal: 11 Médicos de familia, 3 pediatras, 13 de enfermería, 2 Auxiliares de enfermería e 5 PSX/Aux.Adm, 1 Matrona, 1 Traballador Social e 2 Fisioterapeutas.

Este cadro de persoal é o que vai reivindicar Gondomar Concello Aberto para o novo Centro de Saúde de Gondomar.

O pasado mes de marzo presentamos unha Moción ao Pleno da Corporación neste sentido, foi aprobada cos votos a prol de CABE e IxG, a abstención do Goberno (PSOE) e o voto en contra do PP e a non comparecencia no Pleno de MM.

Dende Gondomar Concello Aberto iniciaremos unha campaña de recollida de sinaturas para que a veciñanza de Gondomar participe e apoie esta iniciativa polo Novo Centro de Saúde, un centro que dea resposta a toda a poboación de Gondomar.

Asemade iniciaremos unha xeira de charlas polas parroquias para explicar onde estamos, o que queren facer e o que deberían facer que é o que necesitamos.

Ademais levaremos este tema ao Parlamento. En Marea rexistrará unha iniciativa no Parlamento de Galiza nesta mesma dirección.

Pensamos que non se pode investir nunha infraestrutura tan importante como a atención primaria cunha merma tan importante nos servizos como a que pretenden implantar. Non se pode proxectar un Centro de Saúde que xa nace obsoleto e con déficits evidentes e comprobables.

Un exemplo: En Gondomar hai na actualidade e se quere seguir mantendo 1 pediatra cunha poboación infantil de 0 a 15 anos de 2.212 nenos. No Concello de Nigran hai 3 pediatras cunha poboación infantil de 2.267. En Nigran a ratio é de 1/755, en Gondomar 1/2.212.

Polo que reivindicaremos un Novo Centro de Saúde máis grande que o proxectado actualmente, que será insuficiente e non cubrirá as necesidades actuais da poboación polo que reivindicamos 8 consultas de Medicina Xeral, 2 consultas de pediatría e 1 sala de rehabilitación. Con 11 médicos de familia, 3 pediatras, 13 enfermeiras, 2 Aux, de enfermería, 1 celador 5 PSX, 1 matrona, 1 traballador social e 2 fisioterapeutas.

Nota de Prensa: CABE denuncia a pérdida dunha subvención de 32.000 euros para actuacións medioambientais

En novembro do pasado ano, e tras consultar con expertas e colectivos en defensa do medioambiente, Gondomar Concello Aberto presentou no Pleno Municipal, mediante moción, unha proposta para a solicitude da subvención correspondente ao Fondo de Compensación Ambiental da Xunta de Galicia. Nesta moción, solicitábamos que estes fondos se destinaran á "rexeneración do tramo que, por parte do persoal técnico, se considere máis necesario ou máis axeitado do río Miñor, cunha plantación de árbores autóctonas de bosque de ribeira que posibilite unha futura eliminacion das invasoras", e que se redactara e executara o proxecto por parte de técnicas competentes na materia.

Pese a ser aprobada por unanimidade, unha vez máis o Goberno Municipal caracterízase polo desleixo coas iniciativas da oposición, e, o que é moito peor, coa búsqueda de financiamento para a acción municipal. O prazo para a presentación desta subvención, que sufraga o 80% de proxectos dun máximo de 40.000 euros, rematou o pasado 20 de febreiro e Gondomar nin sequera o solicitou. É inaceptable o desprezo do bipartito a propostas que eles mesmos votan a prol, chegando ata o punto de perder cartos para accións tremendamente necesarias para o noso municipio como é a rexeneración das ribeiras dos nosos ríos.

Gondomar, 25 de marzo de 2017.

Jimena Varela

Grupo Municipal de Gondomar Concello Aberto

Son feminista... (IES Politécnico de Vigo)

Convocatoria da manifestación unitaria de feminismo de Vigo - 8 de marzo

Nota de prensa denunciando a perda de subvencións en materia de igualdade do Concello de Gondomar

GONDOMAR CONCELLO ABERTO DENUNCIA A PERDA DE SUBVENCIÓNS EN MATERIA DE IGUALDADE DO CONCELLO DE GONDOMAR

Este 8 de marzo de 2017, conmemórase nun contexto histórico e político cheo de dificultades para as mulleres en particular. Levamos 16 asasinadas por violencia machista no que vai de ano, o peor número da década. Pero iso só é a punta do iceberg dun sistema cultural chamado patriarcado, que está profundamente instalado na nosa sociedade. Poñendo datos enriba da mesa, a fenda salarial supera en Galicia o 20%, sendo os salarios das mulleres galegas os segundos máis baixos do Estado español (tres de cada 10 galegas (o 36,34%) teñen ingresos por debaixo do Salario Mínimo Interprofesional).

 O pasado día 2 de marzo, no Pleno ordinario do mes de marzo, Gondomar Concello Aberto presentou unha moción con motivo do Día Internacional das Mulleres, aprobada por unanimidade. Ademáis de solicitar que as mulleres do Goberno de Gondomar se sumen ao Paro Feminista Internacional convocado para o 8 de marzo, solicitábamos o aumento do orzamento adicado ás políticas de igualdade. Sabemos as dificultades que isto conleva, tendo en conta que as administracións locais son as máis asfixiadas económicamente, pero trátase dunha aposta política. É por isto que non podemos consentir que, cando existen subvencións doutros entes para políticas de igualde, non se tramiten siquera.

O 2 de xaneiro de 2017, a Federación Española de Municipios e Provincias sacou a seguinte convocatoria: Ayudas para actuaciones dirigidas a facilitar la puesta en marcha de acciones que fomenten la transversalidad de género en los Planes Locales y la conciliación y la corresponsabilidad de mujeres y hombres en la vida personal, familiar y profesional en el ámbito local.  Tratábase dunha subvención que, no caso de Gondomar, podía chegar ata os 10.000 euros. Tras pedir este Grupo Municipal o expediente da tramitación de dita subvención, a resposta da Concellería de Igualdade foi que non tiveron constancia de que existía esa subvención e que polo tanto, non existía ningún expediente .

 Dende Gondomar Concello Aberto novamente esiximos que as políticas en contra da desigualdade entre mulleres e homes sexan unha prioridade real para o Goberno de Gondomar. Isto significa dotalas de recursos, ou ben propios ou mediante subvencións doutros entres, xustamente o que, neste caso, non se fixo no Concello de Gondomar.

 Gondomar, a 7 de marzo de 2017

Jimena Varela Rodríguez

Grupo Municipal de Gondomar Concello Aberto

Nota de prensa denuncioando o incumprimento dos horarios dos autobuses de Melytour

GONDOMAR CONCELLO ABERTO DENUNCIA O INCUMPRIMENTO DOS HORARIOS DOS AUTOBUSES DE MELYTOUR

Melytour publicita na súa páxina web que existe un servizo de autobús os domingos de Vigo a Gondomar ás 20 horas, de Gondomar a Vigo ás 20:30 e novamente de Vigo a Gondomar ás 21 horas. Malia este anuncio, a realidade é que a empresa fai as tres rutas co mesmo conductor e o mesmo autobús, co que lle é imposible chegar a tempo (o percorrido é de 45 minutos aproximadamente) e vai acumulando retrasos: o autobús das 21 horas dos domingos, na práctica non sae ata as 21:30.

Como xa denunciou Gondomar Concello Aberto, a entrada de Gondomar no plan de transporte da Xunta non soluciona o transporte para a xente de Gondomar. Ademáis do histórico problema de Mañufe, temos unha concesionaria que desobedece reiteradamente as súas obrigas, deixando sen transporte a 4 parroquias durante 3 meses ou incumplindo os seus horarios sistemáticamente, e aínda por riba estamos a subvencionala con 90.000 euros de todos e todas as veciñas de Gondomar.

Dende este Grupo Municipal, faremos constar esta queixa á Dirección Xeral de Mobilidade da Xunta de Galicia, solicitando que se inspeccione o servizo prestado por Melytour e se estuden posibles sancións.

Gondomar, 28 de febreiro de 2017.

Jimena Varela

Grupo Municipal de Gondomar Concello Aberto

Posicionamento de CABE sobre o Transporte Interurbano

A equipa de goberno aceptou a entrada de Gondomar no Plan de Transporte Metropolitano da Xunta de Galicia, cun custe de preto de 90.000 euros nos próximos tres anos. Este diñeiro irá ás mans da Xunta e indirectamente ás empresas de transporte, responsabeis ambalasdúas partes do pésimo servizo do transporte urbano que sufrimos no noso Concello; gástase sen termos por contrapartida a obtención de mellora algunha no servizo. Así por exemplo non obtemos solución ás seguintes situacións:

• Seguiremos sen ter un servizo directo entre Gondomar e Vigo, xa que non dá solución ao histórico conflito da concesión a dúas empresas.
• Non se garante ningún novo servizo que solucione as graves deficiencias actuais: o transporte entre a vila e as parroquias; a falta de transporte ao ampus da Universidade, onde cursan este ano académico máis de cen alumnos/as de Gondomar; ou o inadecuado transporte entre as vilas do Val Miñor.
• A mala planificación do transporte escolar, deixado na man das concesionarias. Iso supón que os horarios dos centros escolares do noso concello estean fixados polas empresas, impedindo que os centros poidan fixar as horas de entrada e saída do alumnado consideradas máis adecuadas. A Xunta FIXA OS HORARIOS DOS CENTROS EN FUNCION DAS DEMANDAS DAS EMPRESAS DE TRANSPORTE; NON DAS DOS COLEXIOS.

Por contra, a única contraprestación obtida é unha subvención universal no prezo do billete, que chega ao 100% no caso dos menores de 19 anos.

CABE debe oporse a entrada neste Plan de Transporte da Xunta nas condicións nas que vén proposto polas seguintes razóns:

• Posicionamento político xeral do noso grupo, contrario ás subvencións lineais e universais, entendendo que estas deben ser progresivas en función da renda.
• Falta dun estudo de necesidades do transporte do noso concello que dea lugar a unha planificación axeitada a nivel municipal, incluíndo o transporte mediante empresas concesionarias, o servizo de taxis e posibeis medios propios do Concello. Este sería o punto de partida para negociar a nosa entrada, de ser o caso, no Plan da Xunta.
• Consideramos que con 90.000 euros pódense facer moitas cousas na mellora do transporte en Gondomar, incluíndo unha subvención do billete; mellor ás persoas que ás empresas e en función da renda. É polo que nos opoñemos a entregar ás cegas ese diñeiro á Xunta de Galicia, proposta defendida polo PP de vello e agora polo goberno.

O principal problema, moi típico do noso Concello, é a falta absoluta de planificación, implicando descoñecemento e análise da realidade. A improvisación, o seguidismo de certas políticas (e políticos) pola actual equipa de goberno, este alcalde á fronte. Só observando as declaración do alcalde hai días na prensa para xustificar a petición (tarde piamos) dun transporte entre as parroquias e a vila: “Si Mos tiene un servicio de líneas internas financiado por la Consellería ¿por que los demás no?” Se estes son os argumentos que ten para xustificar as necesidades do noso Concello, podemos dar por seguro que os graves problemas actuais do transporte non van ter solución en moito tempo.

Mos leva máis dun ano traballando neste tema, dispón dun Plan de Transporte Metropolitano e ten constituída unha comisión de Estudo do Transporte Municipal dende hai máis de seis meses, na que participan todos os grupos políticos e os usuarios, ademais dos técnicos/as municipais.

Polo que concluímos que nos poñamos a traballar por Gondomar con sentido e seriedade dende a participación veciñal e non xoguemos alegremente cos cartos e as verdadeiras necesidades dos veciños e veciñas.

Manifesto da Asociación de Escritoras e Escritores en Lingua Galega (AELG) no Día de Rosalía de Castro 2017

- En Galicia existen infinitas formas de amencer: abrente, alborada, clarexa, luzada, rompente.

A lírica que abraza os versos de Rosalía posúe as cores reveladoras da primeira luz.

Imaxino a Rosalía no século XIX e vexo unha muller que se aferra ás palabras sen complexos e fai con elas o que o corazón lle pide ao oído en cada instante: fitas de encaixe, diamantes, armas de construción masiva ou versos predestinados a furar as conciencias e facer cambalear os piares do inmobilismo.

Esa é ela. Unha xigante que non precisa respiración asistida, nin prantos, nin ritos florais. Os pulmóns da súa obra aférranse ao futuro e ínflanse coa forza dun país que respira cultura por cada fenda.

- En Galicia existen infinitas formas de querer e nós querémoste paxaro, lume, emoción. Querémoste eléctrica e lúa. Insubmisa e valente.

A voz que hoxe portaría unha pancarta na cabeza dunha manifestación contra a violencia machista ao berro de: Basta xa, querémonos vivas! A que quedaría afónica de solicitar, día tras día, unha maior presenza do galego na escola, na rúa, na vida. Na Galicia nosa que se estremece por momentos.

Imaxino a Rosalía e véxoa afirmando: Son muller e son galega. Reivindícome como escritora na miña propia lingua e non consinto que ninguén apague a miña voz. Estou tan viva que os meus versos rabuñan as paredes do panteón de galegas ilustres ata facelas sangrar. Négome a ser unha estranxeira exiliada na miña patria. Quero abarcar toda a luz e contaxiarte.

- En Galicia existen infinitas formas de chover:

Como chove miudiño,

como miudiño chove,

pola banda de Laíño,

pola banda de Lestrove.

E con esa maxia pronuncio: babuxa, chuvisca, poalla, chuvieira, barruzo, dioivo. A lírica que arroupa os versos de Rosalía é un bico anfibio. Debaixo da auga nada a pracer, presumindo das súas branquias. Fóra dela, quita o traxe de escamas, mete as mans na terra e arrinca un libro e unha flor.

Esa coa que hoxe queremos agasallar ao mundo.

#RosalíaTe!

Ledicia Costas

Asociación de Escritoras e Escritores en Lingua Galega (AELG)

Convocatoria de xuntanza do Grupo de Comunicación

Convócase xuntanza do grupo decomunicación,
Día e hora: xoves 23 de febreiro ás 20:45 da mañá

Lugar: local CABE

Convocatoria de xuntanza do Grupo Municipal: Luns 20 de febreiro

Convócase xuntanza do grupo de traballo municipal.

Día e hora: luns 20 de febreiro ás 10:00 da mañá

Lugar: local CABE

Marchas da Dignidade: CABE apoia a manifestación do 25 de febrero.

As Marchas da Dignidade, movemento social que en Galicia aglutina a máis de sesenta organizacións e colectivos sindicais, culturais, sociais e políticos, levan tres anos mobilizándose na rúa para esixir o remate das políticas austericidas que agreden a maioría social.

O vindeiro 25 de febreiro hai convocada na Coruña unha manifestación coa defensa das pensións como tema central, aparte das reinvindicacións habituais do movemento: pan, traballo e teito.

Conscientes da situación dramática que padecen moitas persoas maiores, e incluso moitas familias, que dependen dxs pensionistas da casa para sobrevivir, a asemblea de Gondomar Concello Aberto do pasado 14 de febreiro acordou apoiar a mobilización convocada polas Marchas da Dignidade, prevista para o próximo día 25 de febreiro na Coruña, facendo un chamamento aos veciños e veciñas deste concello a participar na mesma.

Gondomar, a 16 de febreiro de 2016

Jimena Varela Rodríguez

Grupo Municipal de Gondomar Concello Aberto

Convocatoria de xuntanza do Grupo de Traballo sobre urbanismo, mobilidade e medio ambiente

Convócase xuntanza do grupo de traballo sobre urbanismo, mobilidade e medio ambiente
Día e hora: luns 13 de febreiro ás 9:30 da mañá

Lugar: local CABE

Convocatoria de Asemblea Veciñal o 14 de febreiro de 2017

A Mesa convoca asemblea veciñal o vindeiro martes 14 de febreiro ás 21:00 no local de CABE, coa seguinte orde do día:

1. Lectura e aprobación, se procede, da acta da asemblea anterior.
2. Información municipal.
3. CABE e EN MAREA. Decisións de relación.
4. Situación económica de CABE. Débedas. Decisións.
5. Propostas do grupo de comunicación: páxina web, ... Decisións.
6. Mesa da asemblea. Decisións.
7. CABE e plataforma anti-TTIP. Adhesión. Decisión.
8. Preguntas, suxestións e outros temas.

Mocións presentadas por CABE ao Pleno ordinario do mes de febreiro de 2017

Mocións presentadas por CABE ao Pleno ordinario do mes de febreiro de 2017:

1. Moción sobre o mantemento dos centros de ensino
2. Moción sobre a participación cidadán en obras nas parroquias

Nota de Prensa sobre o Xulgado de Paz

No Xulgado de Paz de Gondomar aténdese calquera cuestión rexistral que lle planteen as veciñas e veciños, entre outras a expedición de certificados de nacemento, matrimonio ou defunción, xa sexa en forma literal ou de extracto así como expedicións de fe de vida ou estado civil. Tamén se tramitan expedientes de matrimonio e celebracións de voda. Inscricións de matrimonio civil ou relixioso así como a inscrición do nacementos dos fillos ou as defuncións no Concello de Gondomar.

No ámbito civil celébranse xuízos verbais sobre demandas que se refiran a reclamacións de cantidades non superiores aos 90€, actos de conciliación na orde xurisdicional e ditado de dilixencias por auxilio xudicial.

No mes de nadal o goberno municipal, sen avisar, decidiu cambiar a portabilidade do sistema de telefonía. Como consecuencia desta modificación trocouse o seu número fixo de sempre por un número móbil. Evidentemente o fax do Xulgado deixou de funcionar.

Un mes e medio despois o Xulgado de Paz de Gondomar segue sen ter operativo o seu fax, ferramenta imprescindible para realizar de forma correcta o seu traballo xa que a través deste se reciben os exhortos para notificacións ou citacións urxentes dos xulgados de Vigo ou calquera outra demarcación xudicial; tampouco se poden facer peticións de expedición de calquera tipo de certificados ao Rexistro Civil; nin se poden realizar citacións de conciliacións ou mesmo realizar comunicacións varias coa Xunta de Galiza.

A pesares das queixas da veciñanza e dos avisos realizados ao Sr.Alcalde e o seu secretario (Eladio Costas, que para máis inri exerceu de Xuíz de Paz de Gondomar durante anos) esta deficiencia está a día de hoxe sen solucionar.

Dende o grupo municipal de Gondomar Concello Aberto exixímoslle ao Sr.Alcalde una reposición inmediata deste servizo esencial para o funcionamento do Xulgado de Paz e facémoslle responsable de calquera incidencia que se produza por esta falla de dilixencia na acción municipal. Así como faremos chegar unha queixa á Consellaría de Presidencia, Administracións Públicas e Xustiza da Xunta de Galiza, competente tamén na materia.

Gondomar, 31 de xaneiro de 2017

Asdo.: Pauliño del Río Iglesias.

Voceiro do Grupo Municipal de CABE.

Acta da Asemblea Veciñal do 19 de xaneiro de 2017

Xa está dispoñible a acta aprobada da asemblea veciñal celebrada o 19 de xaneiro de 2017 no seguiente enlace:

• Acta da Asemblea veciñal do 19 de xaneiro de 2017

Acta da Asemblea Veciñal do 16 de xullo de 2016

Xa está dispoñible a acta aprobada da asemblea veciñal celebrada o 16 de xullo de 2016 no seguiente enlace:

• Acta da Asemblea veciñal do 16 de xullo de 2016

Concentración en A Ramallosa contra os asasinatos machistas

Ante outro asasinato machista, o de Virginia F. no Carballiño, convócase de novo unha concentración no Val Miñor como xeito de repulsa e para berrar unha vez máis que O MACHISMO MATA!!

Será o vindeiro Mércores 01 de Febreiro ás 20:00 h. na Ramallosa.

Agradécese acudir vestidas de negro.

Convocatoria de Asamblea Veciñal o 28 de xaneiro

A Mesa convoca asemblea extraordinaria o vindeiro sábado 28 de xaneiro ás 19:00 (en primeira convocatoria) no Centro Neural (segunda convocatoria, sen quorum, ás 19:30), coa seguinte orde do día:

1.- Lectura e aprobación, se procede, das actas das asembleas anteriores.
2.- Información municipal.
3.- Cuestións varias de organización:
      -Renovación da mesa (e proposta de "grupo de mesa").
      -Axeitamento á lei vixente.
      -Comisión de contas. Información (e integración de novos compoñentes).
      -Propostas sobre transparencia.
      -Boletín de CABE. Proposta do grupo de comunicación.
4.-, Proposta de integración de CABE na plataforma anti-TTIP.
5.- CABE e En Marea: Información xuntanza con Luis Villares. Decisións.
6.- Preguntas, suxestións e outros temas.

Nota de Prensa sobre desperdicio de auga por parte do Concello

Mentres Augas de Galicia activaba o día 12 deste mes a prealerta por seca na demarcación hidrolóxica Galicia-Costa ante a falla de choivas e o baixo nivel de ríos e encoros por estar nun nivel moi inferior ao normal nesta altura do ano. Por exemplo o embalse de Zamáns está nun 70% da súa capacidade en pleno mes de xaneiro e o de Eiras está nun 80%, cando o habitual nesta época do ano e que estean ao 100%.

Mentres a Axencia Galega de Emerxencia, a Consellaría do Medio Rural, Meteogalicia e Augas de Galicia mantiveron unha xuntanza de coordinación no día de onte onde insistiron na necesidade de moderar o consumo de auga e realizar un uso responsable deste recurso.

Cando a situación metereolóxica atípica dos últimos meses está a provocar que os sistemas hídricos naturais (ríos e acuíferos naturais) non recarguen como sería de esperar e non se produce o almacenamento para unha maior reserva das augas na época estival.

O goberno municipal de Gondomar adícase dende hai cando menos 15 días a baldear as rúas do casco urbano de vila, nun exercicio disparatado de desperdicio de auga.

Cando de todos é sabido que un dos grandes déficits estruturais do noso termo municipal (xunto co saneamento) é a falla de subministro de auga corrente municipal, máis da metade das vivendas do noso concello carecen deste subministro municipal e se teñen que servir das traídas veciñais privadas que existen nas parroquias, ou da auga dos pozos.

E cando levamos escoitando dende sempre que o problema que hai que resolver para solucionar este déficit é que non hai auga dabondo para abastecer a totalidade do subministro municipal, o goberno municipal baldea as rúas en pleno inverno.

Unha vez máis este goberno municipal exemplifica o que non hai que facer e inasequible ao desalento está a estragar un recurso escaso e vital. Logo, dentro duns meses, como cada ano polo vran, emitirán un bando pedíndolle á cidadanía un consumo responsable da auga.

Dende o grupo Municipal de Gondomar Concello Aberto preguntaremos por este tema no próximo Pleno.

Gondomar, 20 de xaneiro de 2017
Pauliño del Río Iglesias.
Voceiro do Grupo Municipal de Gondomar Concello Aberto.

Nin CETA nin TTIP - Concentración o 21 de xaneiro ás 12:00 no Marco

Nota de Prensa sobre a Taxa da Rede Sumidoiros

O período de pago para a Taxa da Rede Sumidoiros, do Concello de Gondomar, vai dende o 16 de novembro de 2016 ao 16 de xaneiro de 2017.

O normal é que antes de que empece este período de pago os contribuíntes reciban nos seus domicilios tributarios o recibo para proceder ao seu pago no devandito período nas contas das entidades bancarias habilitadas a este efecto polo Concello de Gondomar.

Transcorrido este prazo de pago, período voluntario, iniciarase o procedemento executivo de prema, de conformidade coas disposicións establecidas no vixente Regulamento Xeral de Recadación, procedéndose ao cobro das cotas tributarias que non foran satisfeitas, con recargo de prema, xuros de demora e as costas que procedan.

Pois ben, os veciños e veciñas de Gondomar están a recibir nesta semana os recibos para o pago da devantida taxa de Rede Sumidoiros, cando restan menos de 5 días para o peche do período de pago voluntario (16/01/2017). Son máis de dous mil os contribuíntes afectados. O que está a producir un malestar xeralizado cando reciben a comunicación da obrigación do pago e ven o tempo que lles queda para pagar o recibo. Mesmo hai contribuíntes que non recibiron a comunicación a día de hoxe.

Este retraso na notificación dos recibos en ningún caso debe ser imputado aos veciños e veciñas afectados polo que non poden verse de ningún xeitos perxudicados se non poden pagar, polos motivos que sexan, neste período de pago voluntario ordinario e moito menos que teñan que pagar un recargo de prema, xuros de demora ou costas que procedan.

É por este motivo que o grupo municipal de Gondomar Concello Aberto solicita ao Goberno Municipal que se amplíe o prazo de cobro voluntario desta taxa como mínimo nun mes para poder satisfacer o pago do imposto, que se emita a correspondente Resolución da Alcaldía ao efecto, e se publicite a ampliación do prazo mediante un bando da Alcaldía e nun sitio preferente na páxina web do Concello de Gondomar, ou por calquera outro medio que o goberno estime pertinente para darlle a publicidade necesaria a esta medida para que sexa de xeral coñecemento pola cidadanía.

Gondomar, 11 de xaneiro de 2017.

Pauliño del Río Iglesias.
Voceiro do Grupo Municipal Gondomar Concello Aberto.

Convocatoria de Asamblea Veciñal o 19 de xaneiro

A Mesa convoca asemblea extraordinaria o vindeiro xoves 19 de xaneiro ás 21,30 no local de Cabe no CDL cun uúnico punto na orde do día:

- Relación Cabe - En Marea

Convocatoria de Asamblea Veciñal o 10 de decembro

A mesa da asemblea convoca á  Asemblea de CABE o vindeiro sábado 10 de decembro de 2016 ás 19:00 en primeira convocatoria e ás 19:30 en segunda convocatoria no centro Neural coa seguinte orde do día.

Orde do dia :

1. Lectura e aprobación, se procede, da acta da asemblea anterior.
2. Información municipal.
3. Cuestións varias de organización:
   • Renovación da mesa (e proposta de "grupo de mesa").
   • Axeitamento á lei vixente.
   • Comisión de contas. Información (e integración de novos compoñentes).
   • Propostas sobre transparencia.
   • Boletín de CABE. Proposta do grupo de comunicación.
4. Proposta de integración de CABE na plataforma anti-TTIP.
5. CABE e En Marea.
6. Preguntas, suxestións e outros temas.

Asambleas veciñais de CABE sobre a Taxa do Lixo en Borreiros e Mañufe

Dende os principios de participación e cooperación cidadáns, o grupo municipal de CABE fará as seguintes asambleas veciñais para falar da Taxa do Lixo e do Regulamento Medioambiental propostos polo goberno municipal e da nosa alternativa:

• Borreiros: xoves, 8 de decembro ás 12:30 horas.
• Mañufe: domingo, 11 de decembro ás12.30 horas,.

Nota de Prensa sobre a falta de políticas municipais serias no ámbito da violencia machista

Tras un ano e medio no goberno, o bipartito de Gondomar segue sen convocar o Consello Municipal de Muller, a pesar das preguntas de CABE no Pleno ao respecto, e segue sen presentar a avaliación do III Plan de Igualdade 2012-2015, polo que a participación e o seguimento das políticas de igualdade, non só de parte da Corporación senón da sociedade civil, non existen.

Qué loita contra a violencia de xénero conmemora un goberno que non cumple nin sequera os seu propio Plan de Igualdade (que por certo, é o do goberno anterior prorrogado, porque un plan novo, según o Alcalde, “costaba moitos cartos”)? Non se presentou a avalación anual prevista no mesmo, nin a finais do 2015, nin parece que se vaia a facer no 2016.

Dende Gondomar Concello Aberto esiximos que, máis alá dos actos puntuais, as políticas contra a violencia machista sexan unha prioridade durante todo o ano no Concello de Gondomar. As mulleres non queremos nin necesitamos que nos solten globos na nosa honra nin que nos dediquen luces de Nadal, como fai o Concello de Gondomar no Día Internacional contra as Violencias Machistas.

Necesitamos que non nos asasinen, que non nos maltraten, que non nos violen.
Necesitamos formación contra o machismo na infancia e na adolescencia, necesitamos servizos públicos de calidade, necesitamos políticas de conciliación, necesitamos e esiximos ao goberno de Gondomar que nos faga partícipes das decisións e das políticas de igualdade municipais.

Gondomar, 23 de novembro de 2016.
Jimena Varela
Grupo Municipal de Gondomar Concello Aberto

Concentración convocada pola Marcha Mundial das Mulleres polo 25N

Nota de Prensa sobre a incomparecencia dos grupos do goberno municipal na Xunta de Voceiros

Mediante escrito do Concello de Gondomar de data 11.11.2016 fomos convocados polo goberno a unha Xunta de Voceiros a celebrar este pasado xoves día 17 na Sala de Xuntas do Concello de Gondomar.

A devandita Xunta de Voceiros, tiña como orde do día os seguintes puntos:

1. Data da celebración Pleno de decembro.
2. Adhesión convenio de transportes metropolitano.
3. Procedemento de presentación de mocións.
4. Información sobre o Proxecto Sectorial de A Pasaxe.

Ningún membro dos grupos municipais que integran o goberno asistiu á devandita Xunta. Incomparecencia inxustificada e inxustificable. Para máis inri na propia convocatoria puña “en caso de non poder acudir o comunique para poder escusalo”. Tremendo.

Resulta escandaloso que quen convoca unha xuntanza non compareza na mesma, nin tan sequera dea algunha explicación da súa ausencia, mesmo cando existe a posibilidade da súa substitución por outros representantes dos seus grupos políticos.

Ou considera o Sr. Alcalde que os temas a tratar e polo que convocou ao resto dos partidos (Transporte metropolitano ou a Ordenación do Polígono industrial da Pasaxe) non son temas transcendentes e importantes para o Concello de Gondomar. Logo virán coa milonga do consenso. Ou tal vez pretenda o Sr.Ferreira a celebración da Xunta de Voceiros vía facebook.

Esta espantada dos voceiros dos grupos do goberno ven demostrar, unha vez máis, a falla de control e de xestión da administración pública que pretendidamente dirixen. Unha mostra máis do desprezo que o actual goberno, co Sr.Alcalde á cabeza, teñen polo traballo e o tempo do resto da Corporación municipal, que tamén representan á cidadanía de Gondomar.

Dende o grupo Municipal de Gondomar Concello Aberto exiximoslle ao Sr.Alcalde un mínimo de respecto institucional á Corporación que representa.

Gondomar, 18 de novembro de 2016.
Pauliño del Río Iglesias.
Voceiro do Grupo Municipal de Gondomar Concello Aberto.

Convocatorio do Grupo de Traballo de Participación Cidada o 16 de novembro de 2016

Convócase Grupo de Traballo Municipal de Participación para este Mércores 16 de Novembro ás 21:00h na sede de Gondomar CABE sita no CDL de Gondomar.

Orde do día:

1. Lectura do borrador da alegación ao Regulamento de Participación Veciñal por parte do Concelleiro.
2. Propostas de corrección, eliminación e/ou sustitución dos diferentes enunciados do borrador.
3. Propostas.

Charla sobre Axudas Sociais en Nigrán o 18 de novembro

Mocións presentadas por CABE ao Pleno ordinario do mes de novembro

Mocións presentadas por CABE ao Pleno ordinario do mes de novembro:

1. Moción pola derrogación das reválidas
2. Moción para a creación de hortas comunitarias
3. Moción para a solicitude da subvención do fondo de compensación ambiental 2017
4. Moción de apoio ás reivindicacións das traballadoras e traballadores de Extel 

Xuntanza aberta para a formación de En Marea Gondomar

O vindeiro martes 15 de Novembro celebrarase unha xuntanza previa aberta para a formación de En Marea Gondomar.
Lugar: Cafetería Píntega de Gondomar.
Hora: 20,00

Análise e conclusións do Grupo de Traballo Infancia de CABE sobre o equipamento dos parques infantís do concello

O grupo de traballo Infancia de Cabe ten adicado as súas primeiras reunións a analizar os equipamentos dos parques infantís do noso concello xa que consideramos que o xogo é imprescindible para o desenvolvemento dos nenos e nenas e así esta recollido na carta dos dereitos da infancia.
Unha vez analizados os vinte parques que coñecemos, as condicións son moi diversas polo que se pode deducir que non se teñen establecidas unhas condicións mínimas para todos.
O mantemento é escaso ou nulo, excepto no Centro Cultural de Vilaza, o que supón que se vaian deteriorando as instalacións e se incrementen os riscos para os cativos.
Unha vez que se constrúen quedan estáticos sen que se introduzan novos elementos, se modifiquen os existentes ou se introduzan melloras no contorno.
Hai que subliñar que en ningún dos parques existentes existe nin un so elemento adaptado para criaturas con dificultades ou moi pequenas.
Consideramos que se deben establecer uns criterios de mellora para todos eles nos que se contemple:

• Os elementos de xogo a proporcionar aos nenos e nenas, non teñen por que ser os mesmos en todos os parques.
• O mobiliario urbano para acompañar estas instalacións (papeleiras, asentos, fontes de auga potable,...)
• O control do acceso de animais.
• As árbores que doten de sombra, cales son as máis axeitadas. Incrementar a plantación das mesmas, cuidalas para que ofrezan a sombra que se pretende con podas adecuadas e non facendo trasmochados que firan ás árbores e impidan o seu crecemento en boas condicións.
• O mantemento cunha periodicidade establecida que evite riscos aos nenos e nenas.
• A modificación e introdución de elementos que enriquezan as experiencias das crianzas.

Ademais pensamos que se debe buscar un novo xeito de entender estes espazos polo que se debería propor un concurso entre profesionais locais para o deseño e construción actual dun parque infantil que supoña un espazo de ocio e crecemento onde os nenos e nenas poidan xogar e experimentar en liberdade.

Folga do Ensino o 26 de Outubro

Xornadas sobre a Privatización da Sanidad na Unión Europea

Mocións presentadas por CABE ao Pleno ordinario do mes de outubro

Mocións presentadas por CABE ao Pleno ordinario do mes de outubro e aprobadas por unanimidade:

1. Fomento local da mobilidade sostible.
2. Poda axeitada nos parques e xardíns municipais.

Nota de prensa sobre verquido no río Zamáns

NOVO VERQUIDO DE FECAIS AO RÍO ZAMANS EN VINCIOS.

O pasado 27 de setembro, Gondomar Concello Aberto denunciou un verquido de augas fecais orixinado no colector de saneamento do Zamáns á altura do barrio de Rocha na parroquia de Vincios, concretamente na Ponte do Seixidal a 100 metros cara Zamans. No entronque entre o colector principal e o ramal secundario.

Dende Gondomar Concello Aberto pedíramoslle ao goberno municipal, Concellaría de Infraestruturas e Servizos Básicos que tomara cartas no asunto, avaliara os seus efectos, minimizara o seu impacto e puxera os medios necesarios para que non se volvera producir.

Nada disto fixo o incompetente goberno municipal, que obviou o asunto, e seguiu tranquilamente paseando polo facebook e demais redes sociais.

Froito deste pasotismo e inacción do Sr.Alcalde e concelleir@s responsables é que o verquido de augas fecais volveuse producir estes días (achegamos de fotos da desfeita ocasionada).

Tendo en conta que no pasado Pleno Ordinario do mes de outubro, que se celebrou o pasado día 6, preguntamos por este asunto sen que o Sr.Alcalde se dignase nin tan sequera a contestar.

E de que existe na parroquia de Vincios unha evidente e lóxica alarma e preocupación por estes verquidos continuados nas beiras e no propio río Zamáns. Co agravante da súa localización, debemos ter en conta a situación da area de verquido que por estar situada na zona alta do cauce afecta a gran parte do curso do río e a propia Foz do Miñor. Xerando un problema medioambiental e de saúde pública.

É por polo que Gondomar Concello Aberto presentará unha Moción no Pleno de Novembro para tratar este asunto e darlle unha solución.

Gondomar. 14 de outubro de 2016
Pauliño del Río Iglesias.
Voceiro do Grupo Municipal de Gondomar Concello Aberto.

Nova denuncia de verquido no río Zamáns

Un veciño informounos de novos verquidos no Zamáns e enviounos fotos, das que anexamos algunha.

Recordamos que nestes casos o conveniente é facer o seguinte: ante calquera verquido na foz do Miñor, dende Zamáns ata a desembocadura, compre avisar ao 112 (normalmente van ao lugar e toman datos e é a maneira de que quede constancia "oficial"· do verquido. Logo enviar a foto á plataforma polas Defensa da Foz, ao enderezo https://polaprotecciondafozdominor.wordpress.com/manifesto-de-inquedanzas/

Dende CABE, se tamén nos informades, podemos canalizar a denuncia e facela pública.