Nota de Prensa sobre a situación do GES do Val Miñor

A Mancomunidade de Concellos do Val Miñor, integra aos concellos de Baiona, Gondomar e Nigrán, e espállase nun territorio de 145,2 km cadrados dos que 34,9 pertencen a Nigrán, 34,4 a Baiona e 74,5 a Gondomar.

Na actualidade habitan esta mancomunidade preto de 45.000 habitantes, chegando aos 100.000 residentes nos meses do verán.

A dispersión e a grande extensión do seu territorio, complican a atención ás emerxencias, e o tempo de resposta é fundamental.

Logo da vaga de incendios da fin de semana do 14 e 15 deste mes e da situación de caos, de ausencia de medios, de falta de protocolos de actuacións e de carencia de brigadistas e bombeiros. Logo da alarma xerada e da constatación de que estamos unha vez máis vendidos por falla de xestión das administracións competentes. De constatar unha vez máis, como no Prestige, que ante unha catástrofe o estado desaparece e actúa a xente do común. Seguimos nas mesmas.

Agora veñen as promesas, pero imponse a realidade. Despois de todo o acontecido, no Grupo de Emerxencias Supramunicipais do Val Miñor (GES) segue coas mesmas carencias, nesta semana que andamos durante 3 días o servizo estará cuberto por quendas con 1 so bombeiro. Acabouse o lume, acabouse o tema.

Volveremos repetir os mesmos erros? Lembremos que onte mesmo tívose que apagar un lume en Parada Nigrán, nunha zona xa afectada polo lume. Desde Gondomar Concello Aberto queremos denunciar esta situación e reclamamos que se mellore ás condicións de traballo e os recursos materiais e humanos do GES do Val Miñor.

Gondomar, 24 de outubro de 2017.
Asdo.: Pauliño do Río Iglesias.
Voceiro do Grupo Municipal de CABE.

Visita de Luis Villares e Paula Quinteiro a Gondomar

CABE, como marea local dentro do proxecto En Marea, organizou onte unha xuntanza no Centro Cultural de Vincios co noso voceiro nacional Luis Villares e a nosa deputada Paula Quinteiro para que coñeceran de primeira man a situación no noso concello tras a vaga de lumes. 

Ademáis de visitar algunha das zonas máis afectadas, xuntámonos con representantes de comunidades de montes, comunidades de augas, centros culturias e outras entidades, ademáis de con veciñas e veciños afectados, e expuxémoslles, entre outras cosas o abandono e falta de medios que sufrimos durante os lumes, e o desleixo que seguimos a sufrir, unha semana despois, por parte da Xunta de Galicia. Tamén falamos de iniciativas que se poderían levar a cabo nos próximos días e a máis longo prazo para paliar a situación actual e evitar que algo como o que estamos a sufrir volva ocorrer.

CABE ante o desastre do lume no Concello de Gondomar

A Asemblea Veciñal de CABE, ante a catástrofe do lume vivida nestes días quere sumarse á multitude de manifestacións, en primeiro lugar de pésame polas persoas falecidas no noso país e no veciño Portugal, e de solidaridade coas máis directamente afectadas polos efectos das lapas; en segundo lugar de  recoñecemento e agradecemento á veciñanza polo seu comportamento na loita contra o lume, que suplíu de novo a evidente carencia de medios; e, por último de esperanza en que os investigadores e a xustiza poidan facer o seu labor coa eficacia, liberdade e medios necesarios para esclarecer ata as últimas consecuencias as actuacións delictivas que orixinaron esta vaga de lumes.

Sen embargo, consideramos que quedarnos somente nunha declaración deste tipo sería quedar de brazos cruzados esperando a que algo como o acontecido volva ocorrer. Por elo, e co ánimo constructivo que sempre caracteriza as nosas propostas, queremos pór enriba da mesa unha serie de actuacións que consideramos necesarias, dentro do noso ámbito municipal, para paliar na medida do posible o efecto do desastre do lume vivido e evitar a súa repetición. Así, e con caracter inmediato, nas próximas horas, consideramos que o Concello debería pór en marcha medidas efectivas para:

1.     Organizar brigadas de voluntarias: Hai moitas persoas desexosas de facer algo, que ademáis se senten impotentes por non saber como actuar. Aproveitemos esa forza.

2.     Rexenerar o monte:

Minimizar a erosión: Facernos cun protocolo de actuación. Que os hai, doados de conseguir e doados de aplicar con voluntarios. Con indicacións adecuadas.

Favorecer a recuperación: Non se pode facer de calquera xeito, por máis que o ímpetu nos leve a querer plantar e sementar. Porque se queremos recuperar os ecosistemas non se pode sementar nin plantar calquera planta en calquera sitio. Neste senso, dado que este é un ano de landras, deberíase aproveitar para crear viveiros de carballos para a súa posterior plantación nos montes queimados.

3.     Realoxar o gando do monte. No Galiñeiro había dous rabaños grandes de cabras e algúns outros pequenos, polos menos tres de vacas e un de ovellas. Agora mesmo están acurralados onde os donos puideron metelos. En todo o concello hai extensións de campos de poulo, é decir, leiras que xa non se cultivan, pero que teñen diferentes donos e donas. O concello debería facer o esforzo de xestionar isto xa que é o último gando que queda en Gondomar.

4.     Investigar que aconteceu cos cabalos do monte.

5.     Visitar as parroquias e falar coa veciñanza nos seus distintos elementos organizativos: gandeiros, comunidades de augas, de montes, de veciñas, centros culturais....., como única maneira efectiva de conseguir unha información real da situación actual e poder organizar adecuadamente as medidas anteriores. Así mesmo, estas visitas permitirían facer unha recollida de danos particulares co fin de propoñer e solicitar axudas. Hai xente que perdeu os seus cultivos e ten dificultades para manter agora os animais.

Ao marxe destas actuacións inmediatas, consideramos que hai que analizar cuestións como, por exemplo, se se pediu colaboración aos concellos veciños en dotación de bombeiros, bombas de auga, policia... ou tiveron que ofrecela eles; se houbo a adecuada comunicación das autoridades coa poboación; se os presotes de auga contra incendios que hai construídos no monte tiñan auga; ou se as tomas de auga das traídas veciñais respectaron a cantidade mínima que debía quedar para o hábitat correspondente ou estaba toda nas nosas piscinas e duchas. E a máis longo prazo, abordar asuntos como se teremos coraxe de facer un PXOM que respecte os espazos naturais, que delimite seriamente os núcleos habitados e que respecte a distancia das casas ao monte; ou tentar reunir ás Comunidades de Montes cos propietarios das tomadas (montes particulares) e facer que xestionen o monte cun mesmo criterio, un criterio que sexa económico e ao mesmo tempo ambiental. Para abordar todas estas e outras cuestións, consideramos imprescindible que, tras case dous anos sen reunirse, se reactive a Axenda 21 local, como foro aberto e participativo no ámbito medioambiental e de desenvolmento sostible, no que todos os actores involucrados poidan reflexionar sobre os erros que se cometeron e definir políticas que eviten que o acontecido volva suceder.

Outro compoñente que consideramos esencial, é a posta en marcha no noso municipio dun labor educativo, implicando aos centros docentes do noso concello no coidado e reforestación do monte, así como a realización de actividades que impliquen ao alumnado e ás comunidades educativas no seu coidado, única maneira efectiva  para que se sintan parte do mesmo.

Esperamos e desexamos que, cada quen dende as súas responsabilidades, todas sexamos quen de estar á altura do que este desastre demanda, evitando, na medida do posible a sua repetición e que a veciñanza teña que recurrir a autoorganización para suplir carencias ou ineficiencias das diferentes administracións.

Gondomar, a 19 de outubro de 2017

Manifestación o próximo domingo 22 de outubro en Compostela

Dende CABE apoiamos a manifestación que se vai celebrar en Compostela o próximo domingo 22 de Outubro contra a Lei de Depredación de Galicia, e animamos a toda a veciñanza a participar.

Para aqueles que aínda non o saiban, chamamos Lei de Depredación de Galicia a unha lei aprobada o pasado martes 17 de outubro no Parlamento de Galicia e que oficialmente denomínase "Lei de fomento da implantación de iniciativas empresariais".
Esta lei foi aprobada pola vía de urxencia e facilitará que empresas multinacionáis "depreden" o noso rural, xa que modifica outras leis de gran importanca para a xestión do territorio, como son a Lei de Montes, a Lei de Augas, a Lei de Minería, a Lei de Aproveitamento Eólico..., provocando en todas unha maior desregulación e facilidades para as grandes empresas.

Algúns dos efectos de esta lei son:

• Desregulación de todos os ámbitos: mineiro, eólico, forestal...
• Desprotección da poboación afectada, que vai ver moi limitado o seu dereito a alegar ou poder obxectar algo a calquera proxecto. 
• Facilidades nas expropiacións forzosas
• Recortes na capacidade dos Concellos para decidir ante grandes proxectos empresariais eludindo así os controis locais e dependendo da Xunta.
• A Consellería Industria terá poder case absoluto sobre case todos os temas, sen necesidade de ter en conta consideración que outra consellería poida facer, nin Medio Ambiente, nin Medio Rural, nin Urbanismo. Os informes destes outros departamentos van ser preceptivos pero non van ser determinantes. O último criterio, o que vale, vai ser o de Consellería de Industria.

Podedes obter máis información en:
http://www.contraminaccion.org/depredacion/

Convocatoria de Asemblea Veciñal de CABE o xoves 19 de outubro de 2017

Convócase Asemblea Veciñal de Gondomar Concella Aberto (CABE)

Día:  xoves 19 de outubro

 

Hora:

     20,45 h en primeira convocatoria

     21,15 h en  segunda convocatoria 

 

Lugar: Local de Cabe

Orde do día: 

• Lectura e aprobación se procede de actas anteriores
• Análise e propostas ante a situacion actual
• Renovación da mesa da asemblea
• Varios

Concentraccións urxentes de hoxe

Outra máis

Nunhas declaracións feitas hoxe o Sr. Alcalde de Gondomar aconsellou ao Grupo Municipal de GONDOMAR CONCELLO ABERTO a que se “pongan a trabajar por Gondomar que para eso fueron elegidos”.

Que diga isto quen hoxe mesmo suspendeu a Comisión informativa de asuntos do pleno, porque o goberno non tiña propostas que levar á sesión da Corporación municipal do mes de outubro, ten narices.

Esta é a realidade deste goberno e o seu compromiso coa solución dos problemas da xente de Gondomar. Ningunha iniciativa, cero asuntos que trasladar, tratar ou acordar no pleno de outubro. Non é a primeira vez que isto sucede nin será a última. Seica non hai temas dabondo que resolver.

Como di agora a xente nova de Gondomar “Que grande cavaliño”.

Nos si temos propostas e as levaremos a Pleno, que esperemos que se celebre, o próximo martes, día 17.

Gondomar, 11 de outubro de 2017. 
Asdo.: Pauliño del Río Iglesias. 
Voceiro do Grupo Municipal de Gondomar Concello Aberto

Nota de Prensa: Uso do galego

Diante da desaparición do galego nos sinais de tráfico no Polígono da Pasaxe e na entrada ao IES Terra de Turonio de Gondomar, sinais que levaban case dúas décadas sen que orixinaran ningunha controversia ou prexuízo a ninguén, o Grupo Municipal de Gondomar Concello Aberto quere manifestar o seu estupor e repulsa antes estes feitos ante esta nova agresión gratuíta e sen fundamento á lingua galega.

A normativa estatal de tráfico nada expresa contra os idiomas propios, entre eles o idioma propio de Galiza, o galego. (O artigo 5, apartado 1, do vixente Estatuto de Autonomía que establece que “A lingua propia de Galicia é o galego) 

O Real Decreto Lexislativo 6/2015, de 30 de outubro, polo que se aproba o texto refundido da Lei sobre Tráfico, sinala no seu artigo 56 que “As indicacións escritas dos sinais se expresaran, alomenos, na lingua española oficial do Estado”. 

O Real Decreto 1428/2003, de 21 de novembro polo que se aproba o Regulamento Xeral de Circulación establece no seu artigo 138 que as indicacións que acompañen os sinais "figurarán en idioma castelán e, ademais, na lingua oficial da comunidade autónoma recoñecida no estatuto de autonomía, cando a sinalización estea ubicada no ámbito territorial de dita comunidade”. A menos que Gondomar estea fora de Galiza, a retirada do idioma galego dos sinais é claramente ilegal, faise vulnerando a norma. Polo que é radicalmente falso que o goberno municipal estea cumprindo a lei ao establecer o uso exclusivo do español nos sinais.

Ademais esta acción do goberno municipal supón unha nova embestida aos espazos de normalidade e consenso no uso do galego. Os sinais do Polígono da Pasaxe levaban máis de unha década, o do IES Terra de Turonio 18 anos. Que interese esconde crear unha polémica artificial que non existe en Gondomar? A estas alturas quen denuncie un uso abusivo do galego en calquera ámbito da vida ou non vive na realidade ou simplemente ten mala fe.

Estamos ante unha proba máis da falla do apoio decidido polo uso e normalidade do galego do goberno municipal. A hipocresía dun goberno que mentres dicía unha cousa (manteremos o galego nos sinais) facían outra (encargar os sinais so en español).

Os poderes públicos están mandatados para garantir o uso do galego e para potenciar o seu emprego en todos os planos da vida pública, cultural e informativa.

Ante o retroceso en todos os eidos do galego, os representantes políticos temos a obriga de defendelo, de normalizar un legado histórico que recibimos.

En vez diso este goberno municipal non contento con deturpar a toponimia do Concello, de non cumprir coa Lei de normalización linguística en escritos, documentos, convocatorias ou informes, de utilizar carteis so en español nas indicacións das obras municipais ou nas novas instalacións de lecer ou deportivas, agora incumpre a norma ao excluír o galego dos sinais de tráfico.Debemos recordar que ninguén pode ser discriminado por razón da lingua.

Dende a normalidade e a cordialidade na defensa e o agarimo polo noso idioma o Grupo Municipal de Gondomar Concello Aberto exixe a reposición inmediata do galego nos sinais que foron suprimidos polo goberno municipal e levaremos ao próximo Pleno ordinario unha Moción en defensa da normalidade da lingua galega.

Gondomar, 7 de outubro de 2017
Asdo: Pauliño del Rio Iglesias
Voceiro do Grupo Municipal de Gondomar Concello Aberto

CABE volve solicitar unha rectificación pública do alcalde de Gondomar

Despois do bochornoso espectáculo en xuño (cando o sr Alcalde tivo que rectificar públicamente tras acusar falsamente a CABE de perder unha subvención), no pasado pleno do 21 de setembro o sr. Ferreira demostra que pouco aprendeu e volve facer o mesmo. Acúsanos de perder a subvención referente a Actividades medioambientais da liña 3.5 do Plan de Obras e Servizos da Deputación de Pontevedra, cousa que non é certa.

CABE entregou o proxecto para a solicitude desta subvención, consistente nunha campaña de fomento e educación na compostaxe, só a falta de cubrir o anexo (tiña que ser cuberto por un funcionario/a municipal, e a Concellería de Medio Ambiente carece de persoal propio) o día 30 de decembro de 2015. O prazo de remate para a solicitude desta subvención era o día 4 de marzo de 2016, data no que este grupo xa formaba parte na oposición. Se a subvención non foi finalmente enviada á Deputación, e polo tanto perdeuse, só é responsabilidade do bipartito.

É por isto que CABE volve esixir unha rectificación pública do sr. Alcalde e rógalle que deixe de culpar ao noso Grupo municipal da nefasta xestión do goberno que preside.

NOTA: Envíase anexo a Ficha de Control de Expedientes onde consta a data de entrega do proxecto ao secretario personal do Alcalde.

Gondomar, 23 de setembro de 2017.
Jimena Varela
Grupo municipal de Gondomar Concello Aberto

Boletín especial sobre o Centro de Saúde de Gondomar

O boletín especial de CABE sobre o Centro de Saúde xa está dispoñible en: www.cabe.gal/documentos/boletins/boletin-cs.pdf

Convocatoria de Asemblea Veciñal extraordinaria o 21 de setembro

Convócase Asamblea Extraordinaria de Gondomar Concello Aberto,

Día: xoves, día 21 de setembro

Primeira convocatoria: 18 horas

Segunda convocatoria 19 horas

Lugar: local de CABE no CDL

Orde do día:

• Postura de Cabe ante o proxecto da Praza Paradela

Boletín nº 7 de CABE

O boletín nº 7 de CABE, corrrespondente ao mes de xuño, xa está dispoñible en: www.cabe.gal/documentos/boletins/boletin7.pdf

Convocatoria de Asemblea Veciñal o 12 de setembro de 2017

Convócase Asamblea Extraordinaria de Gondomar Concello Aberto,

Día: martes, día 12 de setembro

Primeira convocatoria: 20.45 horas

Segunda convocatoria 21,15

Lugar: local de CABE no CDL


Orde do día:

1. Composición do grupo municipal
2. Campaña a prol do novo Centro de Saúde

Convocatoria de Asemblea Veciñal o 6 de setembro de 2017

Convócase á Asamblea de Gondomar Concello Aberto,

Día: mércores, 6 de setembro

Primeira convocatoria: 20.45 horas

Segunda convocatoria 21,15 orde do día:

Lugar: local de CABE no CDL

Orde do día:

1. Lectura e aprobación, se procede, da acta da asemblea anterior.
2. Información municipal
3. Renovación da mesa da asemblea
4. Rogos e preguntas

CABE: “Hai que ter moita caradura e cinismo para tomar como reféns a unhas nenas e as súas ilusións” (Valmiñor tv)

O goberno municipal levou ao Pleno do pasado luns as subvencións nominativas para o exercicio 2017, que foron aprobadas por unanimidade. Entre elas non estaba incluída ningunha subvención para o Club de Patinaxe Artística de Gondomar. Primeira mentira do Sr. Alcalde de Gondomar.

Hai dúas formas de conceder as subvencións, un procedemento ordinario en réxime de concorrencia competitiva (comparación das solicitudes presentadas) e un excepcional: o de concesión directa que son as subvencións previstas nomitativamente nos orzamentos, estas son as que se aprobaron no Pleno.

“Tiña por tanto o Sr. Ferreira dúas posibilidades: a concesión directa da subvención de 3.000 € ao Club de Patinaxe de Gondomar. Non foi a escollida polo Sr.Alcalde, xa que na relación que se aprobou por unanimidade no pasado pleno non estaba. E non estaba porque o Sr. Alcalde non a incluíu. El saberá o por que, só a el é imputable este feito tal vez por descoido, desidia, ou falta de xestión”, sinala Pauliño del Río, voceiro do Grupo Municipal de CABE.

A outra posibilidade é entrar xunto co resto das asociacións na concesión por concorrencia competitiva: a día de hoxe non está nin feita a convocatoria, nin aprobadas as súas bases reguladoras, nin nomeado o tribunal de valoración, nin publicitados os criterios de valoración, nin os requisitos para solicitar a subvención nin que documentación hai que presentar, nin polo tanto valoradas as propostas para ver as que se aproban e as que se denegan.

“Resumindo, o Sr. Alcalde volveu vender fume, comprometeuse a algo que non cumpriu, e faltoulle ao respecto non só a este Club de Patinaxe senón ás ducias de asociacións, entidades e clubs que solicitan subvención por esta vía e nada teñen garantido que se lles vaia conceder e que cantidade. Ou estaba anunciando o Sr. Alcalde que ía prevaricar concedendo a dedo una subvención que debía resolverse mediante unha valoración?”, engade del Río.

Para o voceiro de Gondomar Concello Aberto, “hai que ter moita caradura e cinismo para tomar como reféns a unhas nenas e as súas ilusións para mentir sobre o que pasou e pretender con isto que se lle dera carta branca para seguir gastando sen control”.

Segundo Pauliño del Río, o que o Alcalde propuxo no pleno nada tiña que ver co patinaxe senón cunha modificación de crédito por valor de 334.000 € porque en 6 meses xa gastou os cartos de todo o ano “e quere seguir gastando a escape libre”.

“Por que non lle explica ás asociacións culturais, deportivas, recreativas ou sociais que tampouco teñen este ano partida para as subvencións, a onde foron os seus cartos”, conclúe o voceiro de CABE.

O Grupo Municipal de Gondomar Concello Aberto fará público proximamente unha xeira de gastos realizados polo goberno bipartito, para que a cidadanía de Gondomar coñeza en que gasta o Alcalde “o diñeiro de todos e todas”.

(https://valminortv.com/2017/07/20/cabe-hai-que-ter-moita-caradura-e-cinismo-para-tomar-como-refens-a-unas-nenas-e-as-suas-ilusions/)

Concentración pola Liberdade dos Presos Políticos Saharauis.

Centro de Saúde: Entrega de sinaturas

O concello de Gondomar tratase dunha zoa de rápido crecemento demográfico de carácter residencial, como expansión da cidade de Vigo e elevada afluencia estival de carácter turístico.

A poboación actual de Gondomar é de 16.085 persoas, cunha poboación infantil menor de 15 anos de 2.212 persoas e de 13.873 adultos

Na actualidade o Centro de Saúde de Gondomar é pequeno e con mala accesibilidade, pola ausencia de aparcamentos e dificultades de circulación rodada xa que esta rodeado de rúas estreitas dun so sentido de circulación.

Ten un dos ratios mais altos de tarxetas sanitarias, da área tanto en Médico de Familia (M.F.) como en pediatría, así como en enfermería. A iso hai que lle engadir que o centro non está a recoller toda a poboación con tarxeta sanitaria do concello so de 10.121 habitantes, dos que 1.352 son menores de 14 anos e 8.769 maiores de 14, que son atendidos no CS Gondomar actualmente, a diferenza está a ser soportada polo centro de saúde de Valmiñor ( a Xunqueira)

A actual estrutura que alberga a Unidade de Atención Primaria é claramente insuficiente. Polo que se fai imprescindible a construción dun novo centro de Atención Primaria, cun Plan Funcional e un programa de espazos que dea resposta as necesidades asistenciais actuais e poda acoller crecementos futuros.

Dada a poboación de Gondomar, 16.085 usuarios, o novo centro de saúde, debe ter unha sala de Rehabilitación con cabinas de tratamento, una sala de Fisioterapia, e unha consulta de fisioterapia. A superficie mínima seria de 1800 m2

Por todo o explicado anteriormente hoxe, vimos de presentar no Rexistro da Xunta de Galiza en Vigo esta petición dun Centro de Saúde que cubra as necesidades reais do noso concello, avalada por 2.012 sinaturas recollidas en Gondomar.

Asemade solicitamos unha entrevista co Conselleiro de Sanidade, D. Jesús Vázquez Almuiña á maior brevidade posíbel, para tratar este asunto dado a prioridade de actuación que ten este tema para a saúde e benestar da veciñanza de Gondomar.

Ademais están rexistradas, con data 26 de xuño de 2017, sendas iniciativas para tratar a construción dun Centro de Saúde que asuma todas as necesidades sanitarias do concello de Gondomar, no Parlamento Galego, polo Grupo En Marea, a través dunha Proposición Non de Lei para o seu debate na Comisión e no Pleno do Parlamento Galego.

Esperamos da Xunta de Galiza un compromiso firme e decidido coa sanidade pública e que modifique o recorte proxectado para o novo centro de saúde que vai nacer xa cun déficit asistencial e sanitario. É un disparate proxectar unha nova infraestructura pensada para 10.000 usuarios cando na actualidade xa conta con máis de 16.000.

HISTORIA E DATOS:

En Decembro de 2008, se deseñou un novo centro de Atención Primaria, en una parcela de 5.000 m2 de titularidade municipal, na zona urbana, dotada dos servizos urbanísticos necesarios e que o concello sa procedeu a realizar a cesión patrimonial o SERGAS. Nese momento o programa de espazos e o Plan Funcional para o novo centro estaba deseñado con capacidade para 8 médicos de Medicina de Familia (3 máis que agora) e 2 Pediatras (1 máis), 8 profesionais de enfermería e 2 de enfermería pediátrica (en total 10 profesionais de enfermería, 5 máis que na actualidade), matrona, traballador social (non existe no actual centro), 4 PSX ( hai na actualidad 3) e unha auxiliar de enfermería (non hai na actualidade). Se contemplaba, un importante crecemento dos recursos de persoal. Esta era a construción no ano 2009. Cunha superficie de 1.565 m2  e un custe de 1.806.842 €.

Este proxecto paralizouse coa chagada do PP a Xunta de Galicia (Sr. Feijoo).

No Consello da Xunta do 14 de Outubro de 2010, nova aprobación do Centro de Saúde sen construílo.

O 10 de Agosto de 2012, licitación de 15 C.S., cofinanciado pola U.E. cos fondos Feder Galicia 2007-2013. Nos que se atopa o C.S. de Gondomar e o de Panxón (Hoxe feito e en funcionamento). Para 10.280 TIS e unha superficie de 1.039 m2 e un custe de 2.400.000 €. O Plan Funcional para o novo centro estaba deseñado con capacidade para 6 médicos de Medicina de Familia e 1 Pediatras, 6 profesionais de enfermería, 1 matrona, 2 PSX e una auxiliar de enfermería

En Maio de 2015, previo as eleccións municipais, comeza a súa construción. En Agosto de 2015, paralizase a construción por quebra da empresa CORSAN-CORVIAM.

En Xullo de 2016, novo anuncio da Xunta que sacara a concurso as obras, sen realizalo.

O 14 de Febreiro de 2017, anunciase unha nova construción do C.S. de Gondomar cunha inversión de 3.000.000 €, para rematar no 2018. Co plan Funcional do 2012.

Ante a parálises da súa construción. O 2 de Marzo, Gondomar Concello Aberto a través do seu grupo municipal, presenta no pleno do Concello unha Moción sobre o Centro de Saúde. Moción que foi aprobada cos votos de Cabe e Iniciativa x Gondomar. Abstención do PSOE. Encontra o PP. Ausencia de Manifesto Miñor.

A plantilla actual do Centro de Saúde de Gondomar é de 7 Médicos de Familia, 1 Pediatra, 7 Enfermeiras 1 Auxiliar de enfermería, 4 PSX/Auxiliar Administrativo e 1 Matrona, para toda a poboación de referencia.

É imprescindible a construción dun novo centro de Atención Primaria, cun Plan Funcional e un programa de espazos que dea resposta as necesidades asistenciais actuais e poda acoller crecementos futuros, en base os ratios do Plan de Mellora de Atención Primaria de 1 médico/1.250 TSI y 1 pediatra/800 menores de 14 años, así como a dotación de espazos necesarios para o desenrolo dos programas asistenciais.

Nos consideramos que en función da poboación existente, as necesidade reais son:

Gondomar, 5 de xullo de 2017.

Asdo.: Pauliño del Río Iglesias.

Voceiro do Grupo Municipal CABE.

(Pódese ver un vídeo explicativo en: https://youtu.be/DiQTzzFVQ1Q)

Convocatoria de reunión de seguimento da campaña do Centro de Saude

O vindeiro luns, 3 de xullo, ás 21 h. teremos unha reunión no local de CABE para coordinar as próximas accións da campaña do Centro de Saúde.

Nota de Prensa: A insensibilidade do goberno cara aos menores saharauis e o programa Vacacións en Paz

En abril deste ano a Asociación Solidariedade Galega co Pobo Saharaui, dirixiu ao Sr. Alcalde e Concelleira de Benestar Social un escrito que entre outras cousa dicia:

“Dirixímonos a través da presente, á institución Municipal para plantexar ás seguintes peticións que consideramos aceptables e posibles para o desenvolvemento da acción de cooperación en causa xusta e xustificada.

O Programa de Vacacións en Paz é un acto solidario e cooperativo de humanitarismo cos cativos e cativas dos Campamentos de Refuxiados no deserto de Tinduf (Arxelia) no que se deu en chamar Hamada (terra infernal).

Mediante o mesmo viaxan varios nenas e nenos ao noso Concello para seren acollidos por familias os dous meses de verán, xullo e agosto. As familias acolledoras realizan un gran esforzo dando alimento, vestido, axudas de todo tipo e mesmo costeando eventos deportivos e culturais, etc. Moitos concellos tamén poñen o seu graniño de area na cooperación, costeando a viaxe das nenas que son acollidas polas familias.

Por este motivo e polo que considerando que no noso Concello hai 4 familias acolledoras, é polo que nos diriximos á Institución para solicitar dúas peticións doadamente factibles:

1º.- Que o noso Concello asine un convenio de cooperación para axudar a costear á viaxe destes nenos e nenas, coa presidenta da Asociación SOGAPS.

2º.- Que se colabore coas familias acolledoras que o desexen, aceptando nos campamentos de verán organizados polo concello para nenas e nenas do municipio a estes nenos. Para así realizar un dos obxectivos básicos do programa Vacacións en Paz que é nin máis nin menos que a socialización, convivindo cos nenas e nenos de aquí e así procurar aprender mellor os nosos idiomas. Agardando a comprensión destas propostas e a aceptación das mesmas so temos que enviarlles un cordial saúdo na esperanza de podermos contar coa súa total colaboración.”

Dado o silenzo do Goberno Municipal, esta asociación saharaui dirixiu, o 29 de maio, o mesmo escrito de Solicitude Institucional aos grupos políticos municipais.

Produto desta solicitude o Grupo Municipal de Gondomar Concello Aberto presentou unha Moción por urxencia ao pleno do 1 de xuño para que se aprobara a seguinte proposta de acordo:

“O Pleno da Corporación Municipal insta ao Sr. Alcalde de Gondomar a que asine, antes do 10 de xuño, o Convenio de Colaboración entre o Concello de Gondomar e a Asociación SOLIDARIEDADE GALEGA CO POBO SAHARAUI, arriba referenciado e que foi entregado ao Goberno Municipal e a todos os Grupos Políticos con representación Municipal, e que se achega con esta proposta de acordo. “

Acordo que se tomou por unanimidade.

Debemos significar que o Concello de Gondomar leva anos contribuíndo a esta causa de Vacacións en Paz dos nenos e nenas saharauis, evitando que estes nenos e nenas permanezan os meses de calor de xullo e agosto nos campamentos con temperaturas en ocasións superiores de 50º e que entre os obxectivos deste Convenio están, entre outros, garantir os dereitos das nenas e nenos á saúde realizando controis médicos oportunos, asegurala súa integridade física e emocional, respectar ás súas crenzas e favorecer a súa integración no medio durante a súa estadía no noso país, facilitando a súa participación en alternativas de ocio e tempo libre. E que a contribución económica por parte da Administración Municipal está nos 3.500€, cantidade destinada a contribuír a sufragar o financiamento dos billetes das nenas e nenos en avión dende o aeroporto de Tindouf ata Peinador.

Dise no preámbulo da Declaración de Dereitos do Neno, que esta se proclama a fin de que nenas e nenos podan ter unha infancia feliz e gozar, no seu propio ben, e no da sociedade, dos dereitos e liberdades que nela se enuncian e insta aos proxenitores, aos homes e mulleres individualmente e ás organizacións particulares, autoridades locais e gobernos a que recoñezan estes dereitos e que loiten polas súa observancia con medidas lexislativas e doutra índole.

E no seu principio II establece que os nenos e nenas gozarán dunha protección especial e disporán de oportunidades e servizos, para que poidan desenrolarse física, mental, moral, espiritual e socialmente en forma saudable e normal, así como en condicións de liberdade e dignidade.

Son ou deberían ser algo máis que palabras acaídas.

Pasaron xa máis de 30 días sen que o goberno municipal co seu Alcalde á cabeza deran cumprida conta deste acordo plenario, seguindo a súa norma de conducta de obviar a vontade da corporación municipal que representa á veciñanza de Gondomar. Hai que volver subliñalo: este acordo foi tomado por unanimidade.

A participación do Concello de Gondomar co programa Vacacións en Paz vense realizando dende hai máis de 20 anos de xeito ininterrompido con todos os gobernos municipais, de diversa cor política, sen excepción. Vai ser este goberno quen se opoña a colaborar? Por acción ou omisión?

Rexeitamos profundamente esta actitude do goberno, máis preocupado polas cuchipandas e realidade virtual que polos temas sociais, educativos ou solidarios do noso concello.

Dende o Grupo Municipal de Gondomar Concello Aberto exiximoslle á goberno municipal a que asinen xa o convenio e deixen de dar escusas inexistentes.

Gondomar, 31 de maio de 2017.

Asdo.: Pauliño do Río Iglesias.

Voceiro do Grupo Municipal de CABE.

Nota de Prensa sobre o Uso do Galego

Ante o ataque á lingua galega e diante do ofrecemento de Galicia Bilingüe para recorrer as multas por non respectar os sinais so en galego de Gondomar, despois da denuncia efectuada pola Guardia Civil por mor do rotulo en galego de tres sinais de tráfico no noso concello, o grupo municipal de Gondomar Concello Aberto debe recordar que o artigo 5, apartado 1, do vixente Estatuto de Autonomía establece que “A lingua propia de Galicia é o galego”.

E no mesmo artigo apartado 3 dise que “Os poderes públicos de Galicia garantirán o uso normal e oficial dos dous idiomas e potenciarán o emprego do galego en tódolos planos da vida pública, cultural e informativa, e disporán os medios necesarios para facilita-lo seu coñecemento”.

No seu apartado 4, establece que “Ninguén poderá ser discriminado por causa da lingua”.

Todos os datos indican un retroceso alarmante no uso do galego a nivel cotiá en calquera dos ámbitos de uso da lingua. O Atlas da UNESCO das linguas do mundo en perigo de extinción inclúe ao galego. A redución do galego en materias de ensino é evidente, e a día de hoxe dáse o esperpento da prohibición de ensinar matemáticas en galego.

Que a estas alturas do século XXI, unha institución ou unha asociación denuncie un uso abusivo do galego en calquera ámbito da vida indica que ou non vive na realidade ou simplemente ten mala fe.

Para mais inri a defensa do idioma propio de Galiza, o galego, feito por este goberno municipal deixa bastante que desexar, mesmo no uso dos topónimos oficiais ou dos cartaces e sinais que se colocan nas rúas ou parques.

Veleiquí a modo de exemplo tres casos para a denuncia nos últimos 6 meses:

Decembro 2016: Esperabamos da asociación galegofóbica Galicia Bilingüe o mesmo ofrecemento na defensa da lingua galega cando o cartace de desvío de tráfico a “Morgadanes”, estivo durante case tres meses nas rúas de Gondomar,

incluso logo de ser tratado no Pleno da Corporación e da promesa do Sr. Alcalde de rectificar o topónimo de xeito inmediato, cousa que non fixo. Sorprendentemente Galicia Bilingüe ficou muda, a pesares da vulneración do dereito e do incumprimento da norma, a lei 3/1983, do 15 de xuño, de normalización lingü.stica, establece que a única forma oficial dos nomes dos lugares (topónimos) de Galicia é a galega.

Abril 2017: Asemade é un magoa que non estivera na defensa do idioma galego cando o sinal que indicaba, en perfecto español, o desvío da estrada en 600 metros que estivo no centro de Gondomar durante mes e medio polas obras da rúa Eduardo Iglesias. De novo a afonía de GB na defensa do idioma propio de Galiza.

Xuño 2017: Ou mesmo o cartace que hai menos de unha semana puxo o goberno municipal no adefesio de pista de deportes enfronte á xefatura da policía local, indicando o uso dunha serie de normas de seguridade, tamén única e exclusivamente en español. Onde están os dereitos dos nenas e nenos galego falantes?

Onde estaba daquela e hoxe a asociación supremacista da lingua española? Na defensa do galego, evidentemente non.

O Grupo Municipal de Gondomar Concello Aberto rexeita de xeito rotundo estas actitudes racistas cara a lingua galega e pide o recoñecemento da normalidade do seu uso en todos os ámbitos.

Gondomar, 26 de xuño de 2017.

Asdo.: Pauliño do Río Iglesias.

Voceiro do Grupo Municipal de CABE.